ടി20 ലോകക്കപ്പില്‍ അങ്കം കുറിക്കാന്‍ ഒരുങ്ങി ഇന്ത്യന്‍ ടീം
ദശലക്ഷക്കണക്കിന് ആളുകളുടെ കാത്തിരിപ്പിന് വിരാമമിട്ട്, ജൂൺ 5 ബുധനാഴ്ച അയർലൻഡിനെതിരെ T20 ലോകകപ്പ് 2024 കാമ്പെയ്ൻ ആരംഭിക്കാൻ ഒരുങ്ങുകയാണ് ഇന്ത്യൻ ക്രിക്കറ്റ് ടീം. ഈ എഡിഷനിൽ ശക്തമായ ടീമുകളില്‍ ഒന്നായ അവര്‍ ലോകക്കപ്പ് നേടാനുള്ള ഫേവറിറ്റ്സ് ടീമില്‍ ഒരങ്കം ആണ്.2007ൽ എംഎസ് ധോണിയുടെ നേതൃത്വത്തിലാണ് ഇന്ത്യ അവസാനമായി ടി20 ലോകകപ്പ് നേടിയത്. അതിനുശേഷം, 2014-ൽ ശ്രീലങ്കയോട് തോറ്റ ഒരു ഫൈനലിൽ മാത്രമേ അവർക്ക് യോഗ്യത നേടാന്‍ കഴിഞ്ഞുള്ളൂ.
ബംഗ്ലാദേശിനെതിരായ സന്നാഹ മത്സര വിജയത്തോടെയാണ് ഇന്ത്യ ഇപ്പോൾ ടൂർണമെൻ്റിലേക്ക് ഇറങ്ങുന്നത്.ന്യൂയോർക്കിലെ നാസൗ കൗണ്ടി ഇൻ്റർനാഷണൽ ക്രിക്കറ്റ് സ്റ്റേഡിയത്തിൽ അയർലൻഡിനെതിരെയാണ് ഇന്ത്യയുടെ മത്സരം.ഇന്ത്യന്‍ സമയം ഇന്ന് രാത്രി എട്ട് മണിക്ക് ആണ് മല്‍സരം ആരംഭിക്കാന്‍ പോകുന്നത്.അടുത്ത കാലത്തായി ടി20യിൽ ഐറിഷ് താരങ്ങൾ മികച്ച ഫോമിലാണ്. മെയ് മാസത്തിൽ നടന്ന മൂന്ന് മത്സരങ്ങളുടെ പരമ്പരയിൽ ഒരു തവണ പാകിസ്ഥാനെ പരാജയപ്പെടുത്താൻ അവർക്ക് കഴിഞ്ഞു. ഒരു സന്നാഹ മത്സരത്തിൽ അവർ നെതർലൻഡ്‌സിനെ മൂന്ന് റൺസിന് പരാജയപ്പെടുത്തി. അയർലൻഡ് തങ്ങളുടെ രണ്ടാം സന്നാഹ മത്സരത്തിൽ ശ്രീലങ്കയോട് 41 റൺസിന് തോറ്റു. അടുത്തതായി ഇന്ത്യയ്‌ക്കെതിരെ വെല്ലുവിളി ഉയര്‍ത്താനുള്ള ലക്ഷ്യത്തില്‍ ആണ് പച്ചപോരാളികള്‍.
