സ്റ്റീവ് സ്മിത്ത് വീണ്ടും ഓസ്ട്രേലിയയുടെ നായകനാകുന്നു
സ്റ്റീവ് സ്മിത്ത് വീണ്ടും ഓസ്ട്രേലിയയുടെ നായകനാകുന്നു. ടെസ്റ്റ് ടീം നായകന്‍ പാറ്റ് കമിന്‍സ് പരിക്കുമൂലം വെസ്റ്റ് ഇന്‍ഡീസിനെതിരായ രണ്ടാം ക്രിക്കറ്റ് ടെസ്റ്റില്‍ നിന്ന് പിന്‍മാറിയതോടെയാണ് സ്റ്റീവ് സ്മിത്തിനെ താല്‍ക്കാലിക ക്യാപ്റ്റനായി നിയോഗിച്ചത്. പരമ്പരയിലെ ആദ്യ ടെസ്റ്റ് ജയിച്ച ഓസ്ട്രേലിയ 1-0ന് മുന്നിലാണ്. പന്ത് ചുരണ്ടല്‍ വിവാദത്തിലെ വിലക്കിനും മാറ്റി നിര്‍ത്തലുകള്‍ക്കും ശേഷം ഇത് രണ്ടാം തവണയാണ് സ്മിത്ത് ഓസ്ട്രേലിയയുടെ താല്‍ക്കാലിക ക്യാപ്റ്റനാകുന്നത്.
കമിന്‍സ് കൊവിഡ് ബാധിതനായതിനെത്തുടര്‍ന്ന് കഴിഞ്ഞവര്‍ഷം ഇംഗ്ലണ്ടിനെതിരായ അഡ്‌ലെയ്ഡ് ടെസ്റ്റിലും സ്മിത്ത് താല്‍ക്കാലിക ക്യാപ്റ്റനായിരുന്നു. എന്നാല്‍ ഓസീസ് ക്യാപ്റ്റന്‍ സ്ഥാനത്തേക്ക് തിരിച്ചെത്തുന്നതിനുള്ള ആദ്യ പടിയാണോ ഇതെന്ന ചോദ്യത്തിന് കമിന്‍സ് അധികനാള്‍ വിട്ടുനില്‍ക്കില്ലെന്നും അദ്ദേഹം ഉടന്‍ തിരിച്ചെത്തുമെന്നും സ്മിത്ത് പറഞ്ഞു.
ദക്ഷിണാഫ്രിക്കക്കും ഇന്ത്യക്കുമെതിരെ വരാനിരിക്കുന്ന സുപ്രധാന പരമ്പരകള്‍ കണക്കിലെടുത്താമ് കമിന്‍സ് മാറി നിന്നതെന്നും സ്മിത്ത് വ്യക്തമാക്കി. അഡ്‌ലെയ്ഡിലാണ് വിന്‍ഡീസിനെതിരായ രണ്ടാം ടെസ്റ്റ് നടക്കുന്നത്. ഇതോടെ തുടര്‍ച്ചയായ രണ്ടാം വര്‍ഷവും അഡ്‌ലെയ്ഡില്‍ നായകനായി തിരിച്ചെത്താനും സ്മിത്തിനായി.
