ബംഗ്ലാദേശിനെതിരായ ടെസ്റ്റ് പരമ്പര; ജഡേജക്ക് പകരം സൗരഭ് കുമാറിനെ പ്രഖ്യാപിക്കും

അടുത്ത മാസം ആരംഭിക്കുന്ന ബംഗ്ലാദേശിനെതിരായ ടെസ്റ്റ് പരമ്പരയിൽ നിന്ന് സ്റ്റാർ ഇന്ത്യൻ ഓൾറൗണ്ടർ രവീന്ദ്ര ജഡേജയെ ഒഴിവാക്കിയതായി ഏറ്റവും പുതിയ റിപ്പോർട്ട്. യുഎഇയിൽ നടന്ന ഏഷ്യാ കപ്പിന് ശേഷം കാൽമുട്ടിന് ശസ്ത്രക്രിയയെ തുടർന്ന് വിശ്രമത്തിലായ താരം ഇതുവരെ പൂർണ ഫിറ്റ്നെസ് വീണ്ടെടുത്തിട്ടില്ലെന്നാണ് വിവരം.

ആയതിനാൽ ഡിസംബർ നാലിന് ആരംഭിക്കുന്ന ബംഗ്ലാദേശിനെതിരായ ഏകദിന പരമ്പരയിൽ നിന്ന് ജഡേജയെ ബിസിസിഐ ഒഴിവാക്കിയിരുന്നു. താരത്തിന് പകരം ഇന്ത്യ എയുടെ സൗരഭ് കുമാറിനെ വരും ദിവസങ്ങളിൽ പകരക്കാരനായി പ്രഖ്യാപിക്കുമെന്നതാണ് ഏറ്റവും പുതിയ വാർത്ത. നിലവിൽ ഇന്ത്യ എ ടീമിന്റെ ഭാഗമായ ഉത്തർപ്രദേശ് ഓൾറൗണ്ടർ സൗരഭ് കുമാർ ബംഗ്ലാദേശ് പരമ്പരയ്ക്കുള്ള ടെസ്റ്റ് ടീമിൽ ജഡേജയ്ക്ക് പകരം ടീമിലെത്താൻ ഒരുങ്ങുകയാണ്. ഏതാനും ദിവസങ്ങൾക്കുള്ളിൽ അദ്ദേഹത്തെ ഉൾപ്പെടുത്തുന്നത് ഔദ്യോഗികമായി പ്രഖ്യാപിക്കും.

കാൽമുട്ടിനേറ്റ പരിക്ക് കാരണം ഓസ്‌ട്രേലിയയിൽ അടുത്തിടെ സമാപിച്ച ടി20 ലോകകപ്പ് നഷ്‌ടമായ രവീന്ദ്ര ജഡേജ, ബംഗ്ലാദേശിനെതിരായ മൂന്ന് മത്സര ഏകദിന പരമ്പരയിൽ നിന്ന് പുറത്തായതോടെ 50 ഓവർ ഫോർമാറ്റിൽ ബംഗ്ലാദേശിനെതിരെ ആർസിബിയുടെ ഓൾറൗണ്ടർ ഷഹബാസ് അഹമ്മദിനെയാണ് ബിസിസിഐ തെരഞ്ഞെടുത്തിരിക്കുന്നത്.