ഓസ്ട്രേലിയയും ഇന്ത്യയുമാണ് ടി20 ലോകകപ്പില്‍ ഫേവറൈറ്റുകളെന്ന് ഇംഗ്ലണ്ട് താരം മൊയീൻ അലി
ആതിഥേയരും നിലവിലെ ചാമ്പ്യന്‍മാരുമായ ഓസ്ട്രേലിയയും ഇന്ത്യയുമാണ് ടി20 ലോകകപ്പില്‍ ഫേവറൈറ്റുകളെന്ന് ജോസ് ബട്‌ലറുടെ അഭാവത്തില്‍ പാക്കിസ്ഥാനെതിരായ ടി20 പരമ്പരയില്‍ ഇംഗ്ലണ്ടിനെ നയിക്കുന്ന മൊയീന്‍ അലി. പാക്കിസ്ഥാനെതിരായ ടി20 പരമ്പരയില്‍ ഇംഗ്ലണ്ടിനെ ജയത്തിലേക്ക് നയിച്ചശേഷം സംസാരിക്കുകയായിരുന്നു താരം.
ഇംഗ്ലണ്ടിനെ നേരിടാന്‍ എതിരാളികള്‍ ഭയക്കുമെങ്കിലും ലോകകപ്പില്‍ ഇംഗ്ലണ്ട് ഫേവറൈറ്റുകളല്ലെന്ന് അലി പറഞ്ഞു. പാക്കിസ്ഥാനെതിരായ പരമ്പര നേട്ടത്തില്‍ സന്തോഷമുണ്ട്. പക്ഷെ ലോകകപ്പില്‍ ഞങ്ങള്‍ ഫേവറൈറ്റുകളല്ല. സത്യസന്ധമായാണ് ഞാനിത് പറയുന്നത്. പാക്കിസ്ഥാനെതിരായ പരമ്പര ജയം ലോകകപ്പിന് മുമ്പ് ടീമിന് ആത്മവിശ്വാസം നല്‍കുമെന്നും അലി കൂട്ടിച്ചേർത്തു.
ജയവും തോല്‍വിയും മാറി മാറിവന്ന പാക്കിസ്ഥാനെതിരായ ഏഴ് മത്സര ടി20 പരമ്പര 4-3നാണ് ഇംഗ്ലണ്ട് ജയിച്ചത്. നിര്‍ണായക അവസാന മത്സരം തുടങ്ങുമ്പോള്‍ ഇരു ടീമുകളും 3-3 തുല്യതയിലായിരുന്നു. എന്നാല്‍ ഇന്നലെ നടന്ന അവസാന മത്സരത്തില്‍ ആദ്യം ബാറ്റ് ചെയ്ത് ഇംഗ്ലണ്ട് ഡേവിഡ് മലന്‍റെ(47 പന്തില്‍ 78) വെടിക്കെട്ട് അര്‍ധസെഞ്ചുറി മികവില്‍ 20 ഓവറില്‍ മൂന്ന് വിക്കറ്റ് നഷ്ടത്തില്‍ 209 റണ്‍സെടുത്തപ്പോള്‍ പാക്കിസ്ഥാന്‍റെ മറുപടി 20 ഓവറില്‍ എട്ട് വിക്കറ്റ് നഷ്ടത്തില്‍ 142 റണ്‍സിലൊതുങ്ങി.
