ടി20 ലോകകപ്പിനായുള്ള ടീമിനെ സെപ്റ്റംബർ 20-ന് പ്രഖ്യാപിക്കുമെന്ന് ന്യൂസിലൻഡ് ക്രിക്കറ്റ്
വരാനിരിക്കുന്ന ടി20 ലോകകപ്പിനായുള്ള ടീമിനെ സെപ്റ്റംബർ 20 ന് പ്രഖ്യാപിക്കുമെന്ന് അറിയിച്ച് ന്യൂസിലൻഡ് ക്രിക്കറ്റ് ബോർഡ്. പേസർ ആദം മിൽനെ ടീമിൽ ഇടംപിടിച്ചേക്കുമെന്നാണ് റിപ്പോർട്ടുകൾ. അതേസമയം കെയ്ൽ ജാമിസൺ ടീമിൽ നിന്ന് പുറത്താകുമെന്നും വാർത്തകളുണ്ട്.
കഴിഞ്ഞ ദിവസം കരാർ നിരസിച്ച ജിമ്മി നീഷവും ലോകകപ്പ് ടീമിൽ ഉണ്ടായേക്കില്ല. ജൂലൈയിൽ അയർലൻഡിനെതിരെ കളിക്കുന്നതിനിടെ പരിക്കേറ്റതിനെ തുടർന്ന് ന്യൂസിലൻഡിന്റെ ഓസ്ട്രേലിയൻ പര്യടനത്തിനിടെ മിൽനെ ടീമിന് പുറത്തായിരുന്നു. ന്യൂസിലാൻഡ് ആതിഥേയത്വം വഹിക്കുന്ന പാകിസ്ഥാൻ, ബംഗ്ലാദേശ് എന്നിവയ്ക്കെതിരായ ടി20 ത്രിരാഷ്ട്ര പരമ്പരയിൽ മിൽനെ പരീക്ഷിച്ചേക്കാം.
ലോകകപ്പിനു മുന്നോടിയായുള്ള ത്രിരാഷ്ട്ര പരമ്പര മൂന്ന് ടീമുകൾക്കും നിർണായകമാണ്. ഇത് വരാനിരിക്കുന്ന ലോകകപ്പിന് തയ്യാറെടുക്കാൻ ടീമുകളെ സഹായിക്കും. മിൽനെ 31 ടി20 അന്താരാഷ്ട്ര മത്സരങ്ങളിൽ കിവീസിനെ പ്രതിനിധീകരിച്ചിട്ടുണ്ട്. 26.68, 7.84 ശരാശരിയിൽ 32 വിക്കറ്റുകളും താരം നേടിയിട്ടുണ്ട്.