ഹാർദിക് പാണ്ഡ്യ ഇന്ത്യയുടെ പുതിയ ക്യാപ്റ്റനാകുമെന്ന് മുൻ ഇന്ത്യൻ ക്രിക്കറ്റ് താരം ഡബ്ല്യുവി രാമൻ

ഓൾറൗണ്ടർ ഹാർദിക് പാണ്ഡ്യ ഇന്ത്യയുടെ പുതിയ ക്യാപ്റ്റനാകുമെന്ന് മുൻ ഇന്ത്യൻ ക്രിക്കറ്റ് താരം ഡബ്ല്യുവി രാമൻ. നിലവിൽ അയർലണ്ട് പര്യടനത്തിൽ ടീം ഇന്ത്യയെ നയിക്കുന്നത് പാണ്ഡ്യയാണ്. ഈ പരമ്പര നേടിയാൽ ഭാവി ഇന്ത്യൻ ക്യാപ്റ്റൻ എന്ന നിലയിൽ താരത്തിന് ഉയർന്നു വരാൻ കഴിയും.

ഐപിഎല്ലിന്റെ പതിനഞ്ചാം സീസണിൽ ഗുജറാത്ത് ടൈറ്റൻസിനെ കിരീടത്തിലെത്തിച്ചതും പാണ്ഡ്യയുടെ നായക മികവായിരുന്നു. ഐപിഎല്ലിൽ പാണ്ഡ്യ തന്റെ ടീമിനെ നയിച്ച രീതി എല്ലാവരുടെയും പ്രതീക്ഷകൾ ഉയർത്തിയെന്നും രാമൻ പറഞ്ഞു. ടൂർണമെന്റിലെ ഇന്ത്യൻ ഓൾറൗണ്ടറുടെ ഏറ്റവും മികച്ച കാര്യം ഉത്തരവാദിത്തം ഏറ്റെടുത്ത രീതിയാണെന്നും അദ്ദേഹം പരാമർശിച്ചു.

കൂടാതെ ഓസ്‌ട്രേലിയയിൽ നടക്കുന്ന ടി20 ലോകകപ്പിൽ ഇന്ത്യൻ ടീമിന് ഹാർദിക്കിന്റെ ഓൾറൗണ്ട് മികവുകൾ മികച്ച ബാലൻസ് നൽകുമെന്നും രാമൻ അഭിപ്രായപ്പെട്ടു. വരാനിരിക്കുന്ന ലോകകപ്പിൽ രോഹിത് ശർമ്മയെ മറികടന്ന് ഹാർദിക് ടീമിനെ നയിക്കണോ എന്ന ചോദ്യത്തിന്,അദ്ദേഹം ഇന്ത്യൻ ടീമിനെ എങ്ങനെ നയിക്കുമെന്ന് കാത്തിരുന്ന് കാണണമെന്നും അയർലണ്ടിലെ പ്രകടനം സെലക്ഷൻ കമ്മിറ്റി എങ്ങനെ വിലയിരുത്തുന്നു എന്നതിനെ ആശ്രയിച്ചിരിക്കുന്നുവെന്നും രാമൻ പറഞ്ഞു.