ഫ്രാങ്ക്ഫർട്ടിലേക്ക് ചേക്കേറി മാരിയോ ഗോട്ട്സെ, ഔദ്യോഗിക പ്രഖ്യാപനം എത്തി
2014 ലോകകപ്പിൽ വിജയ ഗോൾ നേടിയ ജർമനിയുടെ മാരിയോ ഗോട്ട്സെ രണ്ട് വർഷത്തെ ഇടവേളയ്ക്ക് ശേഷം ബുന്ദസ്ലിഗയിലേക്ക് തിരിച്ചെത്തുന്നു. ഹോളണ്ടിലെ പിഎസ്വി എയ്ന്തോവനിൽ നിന്നുമാണ് താരം എയിൻട്രാച്ച് ഫ്രാങ്ക്ഫർട്ടിലേക്ക് കൂടുമാറ്റം നടത്തിയിരിക്കുന്നത്.
താരവുമായി കരാറിലെത്തിയതിന്റെ ഔദ്യോഗിക പ്രഖ്യാപനവും എയിൻട്രാച്ച് നടത്തിയിട്ടുണ്ട്. 30-കാരനായ ഗോട്ട്സെ അറ്റാക്കിങ് മിഡ്ഫീൽഡറായും ഫോർവേഡായും കളിക്കുന്ന താരമാണ്. ഫ്രാങ്ക്ഫർട്ടിനു പുറെ പോർച്ചുഗീസ് ക്ലബ് ബെൻഫിക്ക, അമേരിക്കൻ ക്ലബ് ഇന്റർ മയാമി എന്നീ ടീമുകളും ഗോട്ട്സെയുടെ പിന്നാലെയുണ്ടായിരുന്നെങ്കിലും ഒരിടവേളയ്ക്കു ശേഷം ജർമനിയിലേക്ക് മടങ്ങനാണ് താരം തീരുമാനിച്ചത്.
നാല് ദശലക്ഷം യൂറോ എന്ന ട്രാൻസ്ഫർ തുകയ്ക്കാണ് ഫ്രാങ്ക്ഫർട്ട് ഗോട്ട്സെയെ സ്വന്തമാക്കിയിരിക്കുന്നത്. ജർമൻ ക്ലബുകളായ ബയേൺ മ്യൂണിച്ച് ബൊറൂസിയ ഡോർട്ട്മുണ്ട് എന്നിവർക്കായി കളിച്ച ഗോട്ട്സെ, 2020-ലാണ് ആദ്യമായി ജർമനി വിടുന്നത്. പിഎസ്വിയുടെ ഭാഗമായ താരത്തിന് നിലവിൽ 2024 വരെ ക്ലബുമായി കരാറുണ്ടായിരുന്നു.