അഫ്ഗാനിസ്ഥാനെതിരെ ശ്രീലങ്കക്ക് 145 റണ്‍സ് വിജയലക്ഷ്യം
ടി20 ലോകകപ്പിലെ സൂപ്പര്‍ 12-ല്‍ അഫ്ഗാനിസ്ഥാനെതിരെ ശ്രീലങ്കക്ക് 145 റണ്‍സ് വിജയലക്ഷ്യം. ടോസ് നേടി ബാറ്റിംഗിനിറങ്ങിയ അഫ്ഗാനിസ്ഥാന്‍ 20 ഓവറില്‍ 8 വിക്കറ്റ് നഷ്ടത്തില്‍ 144 റണ്‍സെടുക്കുകയായിരുന്നു. ടോസ് നേടി ക്രീസിലിറങ്ങിയ അഫ്ഗാന് ഓപ്പണര്‍മാരായ ഗുര്‍ബാസും ഉസ്മാന്‍ ഖാനിയും മികച്ച തുടക്കമാണ് നല്‍കിയത്. പവര്‍ പ്ലേയില്‍ വിക്കറ്റ് നഷ്ടമില്ലാതെ ഇരുവരും അഫ്ഗാനെ 42 റണ്‍സിലെത്തിച്ചു.
പവര്‍ പ്ലേക്ക് തൊട്ടുപിന്നാലെ ഘാനിയെ (27) വീഴ്ത്തി ഹസരങ്ക അഫ്ഗാന് ആദ്യ പ്രഹരമേല്‍പ്പിച്ചു. എന്നാല്‍ വണ്‍ ഡൗണായി എത്തിയ ഇബ്രാഹിം സര്‍ദ്രാനും പിടിച്ചുനിന്നതോടെ അഫ്ഗാന് മികച്ച നിലയിലെത്തി. 24 പന്തില്‍ 28 റണ്‍സെടുത്ത ഗുര്‍ബാസിനെ ലഹിരു കുമാര വീഴ്ത്തുമ്പോള്‍ അഫ്ഗാന് 68 റണ്‍സിലെത്തിയിരുന്നു.
നജീബഹുള്ള സര്‍ദ്രാനും (18) ഇബ്രാഹിം സര്‍ദ്രാനും (22) ചേര്‍ന്ന് അഫ്ഗാനെ 100 കടത്തുമെന്ന് കരുതിയെങ്കിലും ഇബ്രാഹിമിനെ കുമാരയും നജീബുള്ളയെ ധന‍ഞ്ജയ ഡിസില്‍വയും വീഴ്ത്തിയതോടെ അഫ്ഗാന്‍റെ കുതിപ്പിന് കടിഞ്ഞാണ്‍ വീണു. പിന്നാലെ ഗുല്‍ബാദിന്‍ നൈബ്(12) റണ്‍ ഔട്ടായി. ക്യാപ്റ്റന്‍ മുഹമ്മദ് നബിക്കും(8 പന്തില്‍ 13) കാര്യമായി ഒന്നും ചെയ്യാനായില്ല. അഫ്ഗാന് വാലറ്റത്തെ ഹസരങ്കയും മടക്കിയതോടെ സ്കോര്‍ 20 ഓവറില്‍ 144ല്‍ ഒതുങ്ങി.
