ടി20 ലോകകപ്പിൽ നിന്നും ബിനുര ഫെർണാണ്ടോ പുറത്ത്, പകരക്കാരനെ പ്രഖ്യാപിച്ച് ശ്രീലങ്ക

ടി20 ലോകകപ്പിൽ നിന്നും ശ്രീലങ്കൻ താരം ബിനുര ഫെർണാണ്ടോ പരിക്കേറ്റ് പുറത്തായി. പകരം അസിത ഫെർണാണ്ടോയെ ലങ്കൻ ടീമിൽ ഉൾപ്പെടുത്തിയതായി ടീം പ്രഖ്യാപിച്ചു. 2022 ഐസിസി പുരുഷ ടി20 ലോകകപ്പിന്റെ ഇവന്റ് ടെക്‌നിക്കൽ കമ്മിറ്റി ശ്രീലങ്കൻ ടീമിൽ ബിനുര ഫെർണാണ്ടോയ്ക്ക് പകരക്കാരനായി അസിത ഫെർണാണ്ടോയെ അംഗീകരിച്ചിട്ടുണ്ട്.

പകരക്കാരനെ ഔദ്യോഗികമായി ടീമിൽ ചേർക്കുന്നതിന് മുമ്പ് ഇവന്റ് ടെക്നിക്കൽ കമ്മിറ്റിയുടെ അംഗീകാരം ആവശ്യമാണ്. പെർത്തിൽ ഓസ്‌ട്രേലിയയ്‌ക്കെതിരെ ചൊവ്വാഴ്ച നടന്ന മത്സരത്തിലാണ് ബിനുര ഫെർണാണ്ടോ ഇടത് ഹാംസ്ട്രിംഗിന് പരിക്കേറ്റ് പുറത്താവുന്നത്.

ലങ്കക്കായി മൂന്ന് ടി20 അന്താരാഷ്ട്ര മത്സരങ്ങൾ കളിച്ചിട്ടുള്ള അസിത ഫെർണാണ്ടോയെ പകരക്കാരനായി എത്തുമ്പോൾ രാജ്യാന്തര തലത്തിലെ പരിചയക്കുറവ് ലങ്കക്ക് തിരിച്ചടിയായേക്കാം. ടൂർണമെന്റിലെ തങ്ങളുടെ ആദ്യ മത്സരത്തിൽ നമീബിയയോട് തോറ്റതിന് ശേഷം ദസുൻ ഷനകയുടെ നേതൃത്വത്തിലുള്ള ശ്രീലങ്ക മികച്ച പ്രകടനമാണ് ഇതുവരെ പുറത്തെടുത്തത്. ഓസീസിനോട് പരാജയപ്പെട്ടെങ്കിലും നാളെ നടക്കാനിരിക്കുന്ന ന്യൂസിലൻഡുമായുള്ള മത്സരം വിജയിക്കാനായാൽ ടീമിന് സെമി സാധ്യതകൾ സജീവമാക്കാം.