ഇംഗ്ലണ്ട് ക്രിക്കറ്റ് ടീമിന്റെ ഇടക്കാല പരിശീലകനായി കോളിംഗ്‌വുഡ്
അടുത്ത മാസം നടക്കാനിരിക്കുന്ന വെസ്റ്റ് ഇൻഡീസിനെതിരായ ടെസ്റ്റിനുള്ള പര്യടനത്തിൽ ഇംഗ്ലണ്ട് ക്രിക്കറ്റ് ടീമിന്റെ ഇടക്കാല മുഖ്യ പരിശീലകനായി പോൾ കോളിംഗ്‌വുഡിനെ നിയമിച്ചു.
ആഷസ് പരമ്പര ഓസീസിന് 0-4ന് അടിയറവു വെച്ചതോടെ ഇംഗ്ലണ്ട് പുരുഷ ക്രിക്കറ്റ് ടീം ഡയറക്ടർ ആഷ്ലി ഗിൽസ്, മുഖ്യ പരിശീലകൻ ക്രിസ് സിൽവർവുഡ്, അസിസ്റ്റന്റ് കോച്ച് ഗ്രഹാം തോർപ്പ് എന്നിവരെ ബോർഡ് പുറത്താക്കിയിരുന്നു. ഈ ഒഴിവിലേക്കാണ് ഇപ്പോൾ കോളിംഗ്‌വുഡ് എത്തുന്നത്.
കഴിഞ്ഞ മാസം വെസ്റ്റ് ഇൻഡീസിലെ ഇംഗ്ലണ്ടിന്റെ ടി20 പര്യടനത്തിന്റെ ചുമതല ഏറ്റെടുത്ത കോളിംഗ്‌വുഡ് ഫെബ്രുവരി 25 ന് പുതിയ ചുമതല ഏറ്റെടുക്കും. ഇംഗ്ലണ്ടിന്റെ മുൻതാരം കൂടിയായ പോൾ നിലവിൽ ബാർബഡോസിൽ അവധിക്കാലം ആഘോഷിക്കുകയാണ്.
ഫെബ്രുവരി 24-ന് ഇംഗ്ലണ്ട് ടീം യുകെയിൽ നിന്ന് പുറപ്പെടും. ഇന്ത്യക്കെതിരായ പരമ്പരയ്ക്കു ശേഷം വിൻഡീസ് നേരിടുന്ന എതിരാളികളാവും ഇംഗ്ലണ്ട്. ആഷസ് പരമ്പരയിൽ ഓസ്ട്രേലിയയോട് വമ്പൻ തോൽവി ഏറ്റുവാങ്ങിയ നിരാശയുടെ പശ്ചാത്തലത്തിൽ ഏറെ വെല്ലുവിളി നിറഞ്ഞതാണെങ്കിലും വെസ്റ്റ് ഇൻഡീസിനെതിരായ ടെസ്റ്റ് പരമ്പര ടീമിന്റെ ആത്മവിശ്വാസം വീണ്ടെടുക്കാൻ ലഭിച്ച മികച്ച അവസരമാണെന്നും പോൾ കോളിംഗ്‌വുഡ് പറഞ്ഞു.
