ഫ്രാന്‍സിനെ സമനിലയില്‍ തളച്ച് ഗ്രീസ്
ചൊവ്വാഴ്ച നടന്ന ഗ്രൂപ്പ് ബിയിലെ അവസാന യൂറോ 2024 യോഗ്യതാ മത്സരത്തിൽ ഫ്രാൻസിനെ 2-2 ന് സമനിലയിൽ തളച്ച് ഗ്രീസ് ഗ്രൂപ്പില്‍ തങ്ങളുടെ മൂന്നാം സ്ഥാനം നിലനിര്‍ത്തി.കഴിഞ്ഞ ഏഴു മല്‍സരങ്ങളില്‍ തുടര്‍ച്ചയായ ജയം നേടി മുന്നേറിയ ഈ ഫ്രാന്‍സ് ടീമിനെ സമനിലയില്‍ തളക്കാന്‍ കഴിഞ്ഞ ഏക ടീമും ഗ്രീസ് തന്നെ ആണ്.
മൂന്നാം സ്ഥാനം നേടിയ ഈ ഗ്രീക്ക് ടീം ഇനി അടുത്ത വര്‍ഷം യൂറോ യോഗ്യത നേടുന്നതിന് വേണ്ടി നോക്കൌട്ട് കളിച്ച് ജയിക്കേണ്ടി വരും.ഗ്രീസ് ടീമിന് വേണ്ടി അനസ്താസിയോസ് ബകസെറ്റാസ് , ഫോട്ടിസ് ഇയോനിഡിസ് എന്നിവര്‍ ഗോള്‍ കണ്ടെത്തിയപ്പോള്‍ ഫ്രാന്‍സിന് വേണ്ടി സ്കോര്‍ബോര്‍ഡില്‍ ഇടം നേടിയവര്‍ റാൻഡൽ കോലോ മുവാനി , യൂസഫ് ഫൊഫാന എന്നിവര്‍ ആണ്.സൂപ്പര്‍ താരമായ കിലിയന്‍ എംബാപ്പെക്ക് ഇന്നലെ ആദ്യ ഇലവനില്‍ സ്ഥാനം കോച്ച് നല്‍കിയിരുന്നില്ല.
