Cricket Epic matches and incidents legends Top News

ആ കൊടുങ്കാറ്റിന്റെ ഓർമയ്ക്ക്

August 4, 2019

author:

ആ കൊടുങ്കാറ്റിന്റെ ഓർമയ്ക്ക്

നൂറ്റിയൻപത്തഞ്ചു ഗ്രാം ഭാരമുള്ള ആ തുകൽപന്ത് അത്രതതന്നെ കിലോമീറ്റർ വേഗതയിലെറിഞ്ഞാലും അയാളുടെ മുന്നിലെത്തുമ്പോൾ ഒരു തൂവൽ പോലെ മൃദുലമാകുന്നു !!.

1998 ഏപ്രിൽ ഇരുപത്തിരണ്ടാം തീയതി ഷാർജ ക്രിക്കറ്റ്‌ സ്റ്റേഡിയത്തിൽ കളത്തിലിറങ്ങിയ ഓസ്ട്രേലിയൻ ടീമംഗങ്ങൾ മാത്രമല്ല ഗാലറിയിൽ ആ ഇന്നിംഗ്സ് നേരിൽ കണ്ട ഓരോ വ്യക്തിയും ഒരു നിമിഷമെങ്കിലും അപ്രകാരം ചിന്തിച്ചിരിക്കണം. അത്രമേൽ മനോഹരമായിരുന്നു ആ ബാറ്റിങ് വിരുന്ന്. ഒരുപക്ഷെ മണലാരണ്യം ഇന്നേവരെ സാക്ഷ്യം വഹിച്ചതിൽ ഏറ്റവും മനോഹരമായ ഇന്നിംഗ്സ് !!.

ഇന്ത്യയും ഓസ്ട്രേലിയയും ന്യൂസിലാൻഡും മാറ്റുരച്ച 1998ലെ കൊക്കകോള കപ്പ്‌, കളിച്ച എല്ലാ മത്സരങ്ങളും ജയിച്ച ഓസ്ട്രേലിയ നേരത്തെ ഫൈനൽ പ്രവേശനം ഉറപ്പാക്കിയിരുന്നു. തമ്മിൽ ശക്തിപരീക്ഷണം നടത്തിയപ്പോൾ ഓരോ മത്സരം വീതം ജയിച്ച ഇന്ത്യയും ന്യൂസിലാൻഡും തമ്മിലുള്ള വ്യത്യാസം വെറും നൂറിലൊരു ശതമാനം റണ്ണുകൾ മാത്രമായിരിക്കെയാണ് ഇന്ത്യ അവസാന ലീഗ് മത്സരത്തിൽ കരുത്തരായ ഓസീസിനെ നേരിട്ടത്.

ഇരുനൂറ്റി അൻപതു റണ്ണിനുമേൽ വരുന്ന ഏതൊരു സ്കോറും സുനിഛിത വിജയം നൽകുന്ന കാലഘട്ടത്തിലായിരുന്നു അക്കാലത്തെ എറ്റവും മികച്ച ഫിനിഷർ മൈക്കൽ ബെവന്റെ സെഞ്ചുറിയുടെ പിൻബലത്തിൽ ഓസ്‌ട്രേലിയ ഏഴു വിക്കറ്റ് നഷ്ടത്തിൽ 284 റണ്ണുകൾ അടിച്ചു കൂട്ടിയത്. മികച്ച പേസ് ബൗളെർമാരായ ഡാമിയൻ ഫ്ലെമിങ്ങിന്റെയും കാസ്പറോവിച്ചിന്റെയും ലോക ക്രിക്കറ്റിലെ ഏറ്റവും മികച്ച ലെഗ് സ്പിന്നർ ഷെയ്ൻ വോണിന്റെയും സാന്നിധ്യമുള്ള ഓസീസ് ബൌളിംഗ് നിര ആ സ്കോർ പ്രതിരോധിക്കാൻ ശക്തമായിരുന്നു. ഓസ്‌ട്രേലിയ നേടിയ കൂറ്റൻ സ്കോർ അവരുടെ അയൽക്കാരായ ന്യൂസിലൻഡിനെയും സന്തോഷിപ്പിച്ചു, റൺ റേറ്റിൽ അവരെ പിന്തള്ളി ഫൈനലിൽ പ്രവേശിക്കണമെങ്കിൽ ഇന്ത്യയ്ക്കു നിശ്ചിത 50 ഓവറുകളിൽ 254 റണ്ണുകൾ നേടേണ്ടിയിരുന്നു. മുൻ മത്സരങ്ങളിൽ ഇന്ത്യ ഓസ്ട്രേലിയയോടു കീഴടങ്ങിയ രീതി വച്ചു നോക്കിയാൽ ഏതാണ്ട് അപ്രാപ്യമായ ഒരു ലക്ഷ്യമായിരുന്നു അത് !!.

“Dont worry coach, I will be there till the end”.

വലിയ ലക്ഷ്യവും, ചുമലിൽ ഇന്ത്യൻ പ്രതീക്ഷകളുടെ ഭാരവുമായി സച്ചിൻ ക്രീസിലേക്കിറങ്ങിയത് ഇന്ത്യൻ കോച്ച് അംശുമാൻ ഗെയ്ക്‌വാദിനൊരു ഉറപ്പു നൽകിക്കൊണ്ടായിരുന്നു.

ആദ്യ ഓവറുകളിൽ ആക്രമണത്തിന്റെ ചുമതല സൗരവ് ഗാംഗുലിയെ ഏല്പിച്ച സച്ചിൻ ഒരറ്റത്തു സൗമ്യനായി നിലകൊണ്ടു. പക്ഷേ പതിവിനു വിപരീതമായി തന്റെ സുഹൃത്ത താളം കണ്ടെത്താനാകാതെ വിഷമിക്കുന്നതു കണ്ട സച്ചിൻ ആക്രമണത്തിന്റെ ചുമതല സ്വയമേറ്റെടുത്തു. ആ കൊടുങ്കാറ്റിന്റെ ആദ്യ പ്രഹരമേറ്റത് മൈക്കൽ കാസ്പറോവിച്ചിനായിരുന്നു. നിർലോഭം ഷോർട് ബോളുകൾ ചൊരിയുന്ന കാസ്പറോവിച്ചിന്റെ തുടർച്ചയായ രണ്ടു പന്തുകൾ നിലം തൊടാതെ അതിർത്തിവര കടന്നു. സച്ചിൻ തന്റെ നയം വ്യക്തമാക്കുകയായിരുന്നു അവിടെ, ഭയന്നു പിന്മാറാൻ എനിക്കുദ്ദേശമില്ല, പാളയത്തിലേക്കു പട നയിക്കാനാണ് എനിക്കിഷ്ടം!!.

തൊട്ടടുത്ത കാസ്പറോവിച്ചിന്റെ ഓവറിൽ വീണ്ടുമൊരു സിക്സിനു ശ്രമിച്ചെങ്കിലും സച്ചിനു പിഴച്ചു, ഒരു ലീഡിങ് എഡ്ജ് തേർഡ് മാനിലേക്കു പറന്നുയർന്നു!!. മൂന്നു ഓസീസ് ഫീൽഡർമാരുടെയിടയിലായി സുരക്ഷിതമായി ആ പന്തു നിലം തൊട്ടതോടെ ഭാഗ്യവും തന്റെ നയം വ്യക്തമാക്കുകയായിരുന്നുവെന്നു തോന്നി, വെറും രണ്ടു ദിവസം മാത്രമകലെ തന്റെ ഇരുപത്തിയഞ്ചാം ജന്മദിനമാഘോഷിക്കുന്ന സച്ചിനെ നിരാശപ്പെടുത്താൻ വിധിക്കുദ്ദേശമില്ലായിരുന്നിരിക്കണം.

താളം കണ്ടെത്താൻ കഴിയാതിരുന്ന സൗരവ് ഗാംഗുലി വേഗത്തിൽ പുറത്തായതോടെ വന്ന നയൻ മോൻഗിയയെ കൂട്ടുപിടിച്ച സച്ചിൻ ഇന്ത്യൻ ബാറ്റിങ്ങിന്റെ ഗിയറുകൾ പതിയെ നീക്കിത്തുടങ്ങി. പന്ത്രണ്ടാം ഓവറിൽ ഡാമിയൻ ഫ്ലെമിങ്ങിനെതിരെ നേടിയ ആ കവർ ഡ്രൈവിന്റെ സൗന്ദര്യം പോയന്റിൽ ഫീൽഡ് ചെയ്തിരുന്ന ഷെയ്ൻ വോണിന്റെ മുഖത്തുനിന്നും വായിച്ചെടുക്കാമായിരുന്നു. കാസ്പറോവിച്ചിന്റെയും ടോം മൂഡിയുടെയും പന്തുകൾ പലകുറി അതിർത്തി വരകൾക്കപ്പുറം കാണികളുമായി സംവദിച്ചു. തന്റെ പരിശീലകനോടു പറഞ്ഞതുപോലെ ഒരു നീണ്ട ഇന്നിംഗ്സ് കളിക്കാനുറച്ചായിരുന്നു അയാൾ ക്രീസിലേക്കു വന്നത്. ഓരോ ബൗളെർമാരുടെയും ലെങ്ത്കൾ സച്ചിൻ നേരത്തെ മനഃപാഠമാക്കിയതുപോലെ തോന്നി. ഫ്ലെമിങ്ങിന്റെയും കാസ്പറോവിച്ചിന്റെയും പന്തുകളെ പലപ്പോഴും ക്രീസിനു വെളിയിൽ വന്നാണ് അയാൾ നേരിട്ടത് !!.

ഇതിനിടെ പക്ഷേ ഒരറ്റത്തു വിക്കറ്റുകൾ വീണുതുടങ്ങിയിരുന്നു. നയൻ മോൻഗിയയ്ക്കു ശേഷം വന്ന അസ്‌ഹറുദ്ദീനും, ജഡേജയും വന്നപോലെ മടങ്ങി. നാലു വിക്കറ്റ് നഷ്ടത്തിൽ 138 എന്ന നിലയിലേക്കു പതിച്ച ഇന്ത്യൻ ഇന്നിംഗിസിനു തടസ്സമായി ശക്തമായ പൊടിക്കാറ്റുമെത്തി.

ഒരു പക്ഷേ കൊടുങ്കാറ്റുകളുടെ ദിനമായിരിക്കാം ഏപ്രിൽ 22. അവയ്ക്കു തുടക്കമിട്ടത് ആ മണൽക്കാറ്റായിരിക്കാം, അര മണിക്കൂറോളം കളി നഷ്ടപ്പെടുത്തിയ മണൽക്കാറ്റിനു ശേഷം “സച്ചിൻ രമേശ്‌ ടെണ്ടുൽക്കർ” എന്ന് ബാറ്റ്സ്മാൻ ക്രീസിലേക്കെത്തിയത് പുതിയൊരു കൊടുങ്കാറ്റിന് തുടക്കമിടാനായിരിക്കാം.

മണൽക്കാറ്റിനെത്തുടർന്ന് ഇന്ത്യൻ വിജയലക്ഷ്യം 46 ഓവറിൽ 276 ആയി പുനർ നിര്ണയിക്കപ്പെട്ടു. ഫൈനൽ പ്രവേശനത്തിനായി വേണ്ടിയിരുന്നത് 237 റണ്ണുകളും. മധ്യനിരയിലെ നെടുംതൂണുകളെ നഷ്ടപ്പെട്ട ഇന്ത്യൻ വിജയലക്ഷ്യം ഓവറിൽ ഏഴു റണ്ണോളമെത്തി. പക്ഷേ സച്ചിൻ പോരാടാനുറച്ചു തന്നെയായിരുന്നു. മത്സരം പുനരാംഭിച്ച ഓവറിലെ അവസാന പന്ത് സൈറ്റ് സ്ക്രീനിനു മുകളിലൂടെ ഗാലറിയിൽ പതിച്ചു. മുപ്പത്തിയഞ്ചാം ഓവറിലെ ആദ്യ പന്തിൽ നേടിയ ബൗണ്ടറി ടെന്നീസിലെ ഫോർഹാൻഡ്‌ ഷോട്ടുകളെ അനുസ്മരിപ്പിച്ചു !!. ഫ്ലിക്കുകളും കവർ ഡ്രൈവുകളും നിർബാധം പ്രവഹിച്ചപ്പോൾ കമന്ററി ബോക്സിൽ പ്രഗത്ഭ കളി വിദഗ്ധൻ ടോണി ഗ്രെയ്ഗ് വാക്കുകൾക്കായി പരതുകയായിരുന്നു.

“What a player, What a wonderful player !!”.

ഈ വാക്കുകൾ ടോണി ഉച്ചരിച്ചത് അത്രയേറെ ആത്മാർത്ഥമായായിരുന്നു. ലോകം കണ്ട ഏറ്റവും തന്ത്രജ്ഞനായ സ്റ്റീവ് വോ എന്ന നായകൻ ആവനാഴിയിൽ അസ്ത്രങ്ങൾക്കായി പരതി, ഒന്നും തന്നെ സംഭവിച്ചില്ല, ഓരോ ഓവറിലും കൃത്യമായ പ്ലാനിങ്ങോടെ ആ കുറിയ മനുഷ്യൻ ഇന്ത്യയെ മുന്നോട്ടു നയിച്ചു. ഫീൽഡർമാർ ബൗണ്ടറികളിൽ നിന്നും പന്തുമായി തിരികെ വരുന്നത് നോക്കി നിൽക്കാനേ സ്റ്റീവിനു കഴിഞ്ഞുള്ളു.

മത്സരത്തിന്റെ മുപ്പത്തിയൊമ്പതാം ഓവറിൽ സച്ചിൻ തന്റെ സെഞ്ചുറി പൂർത്തിയാക്കിയപ്പോൾ ടീം സ്കോർ ഇരുന്നൂറു പോലുമെത്തിയിരുന്നില്ല. സെഞ്ചുറി നേടിയ ശേഷം അടുത്ത നാലോവറിനുള്ളിൽ രണ്ടു സിക്സുകളും നാലു ഫോറുകളും അടിച്ചു കൂട്ടിയ സച്ചിൻ ഇന്ത്യയുടെ ഫൈനൽ പ്രവേശനം ഉറപ്പാക്കിയിരുന്നു. ഒടുവിൽ ഫ്ലെമിങ്ങിന്റെ ലെഗ് സൈഡിനു പുറത്തേക്കുപോയ പന്തിൽ ഗിൽക്രിസ്റ്റിനു പിടികൊടുക്കുമ്പോൾ അമ്പയറിനു പോലും വിശ്വാസമായിരുന്നില്ല. പക്ഷേ, അയാൾ തിരികെ പവലിയനിലേക്കു നടന്നു കാരണം അയാൾക്ക് അത്രയേറെ നിർബന്ധമായിരുന്നു, അമ്പയറുടെ ഭാഗത്തു നിന്നു പോലും ആ ഇന്നിങ്‌സിനൊരു കളങ്കമേൽകരുതെന്ന്, ഇന്ത്യയുടെ ഫൈനൽ പ്രവേശം അത്രയേറെ സംപൂർണമാകണമെന്ന് !!.

പരിശീലകനു നൽകിയ വാക്കുകൾ അദ്ദേഹം പാലിച്ചുവോ?, തീർച്ചയായും അതേയെന്നാണ് ഉത്തരം. ഇന്നിങ്സിൽ ഇന്ത്യ നേടിയ 250 റണ്ണുകളിൽ 143ഉം ആ ബാറ്റിൽ നിന്നായിരുന്നു. നയൻ മോൻഗിയ നേടിയ 35 റണ്ണുകളായിരുന്നു ഇന്ത്യൻ ഇന്നിഗ്‌സിലെ രണ്ടാമത്തെ മികച്ച സ്കോർ എന്നറിയുമ്പോൾ മാത്രമേ ആ പ്രകടനത്തിന്റെ പൂർണത വ്യക്തമാകൂ.

എങ്കിലും അയാൾ തൃപ്തനായിരുന്നില്ല, പാതിയിൽ നിന്നുപോയൊരു സംഗീത വിരുന്നു പോലെയായിരുന്നു ആ പ്രകടനം. വെറും രണ്ടു ദിവസങ്ങൾക്കു ശേഷം കൂടുതൽ മാധുര്യത്തോടെ തന്റെ പിറന്നാൾ ദിനത്തിൽ അയാളാ വിരുന്നു പൂർത്തിയാക്കിയപ്പോൾ ഇന്ത്യക്കു ലഭിച്ചത് കിരീടവിജയത്തിന്റെ അതുല്യ മുഹൂർത്തങ്ങൾ കൂടിയായിരുന്നു.

“മാസ്സുമാണ്, ക്ലാസ്സുമാണ്”.

അടുത്തിടെ കേട്ടൊരു ചലച്ചിത്രത്തിന്റെ പരസ്യവാചകമാണിത്.

പക്ഷേ ഈ വാചകങ്ങൾ രണ്ടു പതിറ്റാണ്ടുകൾക്കു മുന്നേ ടോണി ഗ്രെയ്ഗിന്റെ നാവിൽ നിന്നും ഞാൻ കേട്ടിരുന്നു..

“Look at that man, he got both mass and class”.

Leave a comment

Your email address will not be published. Required fields are marked *