സീരി എ യില്‍ വിജയ വഴിയിലേക്ക് തിരിച്ചെത്തി യുവന്‍റസ്
ഇന്നലെ മല്‍സരത്തിന് മുന്നേ തുല്യ ശക്തികള്‍ ആണ് എന്നു തോന്നിച്ചു എങ്കിലും ഉഡിനീസ് തങ്ങള്‍ക്ക് പോന്ന എതിരാളി അല്ല എന്നു യുവന്‍റസ് തെളിയിച്ചു.ഇന്നലെ നടന്ന ഹോം മല്‍സരത്തില്‍ ഉഡിനീസിനെ എതിരില്ലാത്ത രണ്ടു ഗോളിന് യൂവേ പരാജയപ്പെടുത്തി. ജയത്തോടെ ലീഗ് പട്ടികയില്‍ ഓല്‍ഡ് ലേഡി മൂന്നാം സ്ഥാനത്തേക്ക് കയറി.ഉഡിനീസ് നിലവില്‍ പതിനാറു പോയിന്റോടെ ഏഴാം സ്ഥാനത്ത് ആണ്.
ചാമ്പ്യൻസ് ലീഗ് തോൽവിക്കും രണ്ട് ലീഗ് സമനിലകൾക്കും പിന്നാലെ തുടക്കത്തില്‍ തന്നെ യുവന്‍റസ് ആക്രമിച്ച് കളിച്ചു.തുടക്കം മുതൽ ആധിപത്യം പുലർത്തിയ തിയാഗോ മോട്ടയുടെ ടീം 19-ാം മിനിറ്റിൽ ലീഡ് നേടി, കെഫ്രെൻ തുറാമിൻ്റെ ഷോട്ട് ഉഡിനീസ് ഗോൾകീപ്പർ ഒകോയെയുടെ പുറകിൽ തട്ടി വലയിലേക്ക് കയറി.37-ാം മിനിറ്റിൽ കെനാൻ യിൽഡിസിൻ്റെ ഷോട്ടിൽ നിന്നും വന്ന റീബൌണ്ട് വലയിലേക്ക് തട്ടി ഇട്ടു സവോണ ലീഡ് ഇരട്ടിയാക്കിയാക്കുകയും ചെയ്തു.രണ്ടാം പകുതിയില്‍ ഉഡിനീസ് ആക്രമണത്തിന്റെ മൂര്‍ച്ച വര്‍ധിപ്പിച്ചു എങ്കിലും കാര്യമായി ഒന്നും ചെയ്യാന്‍ കഴിഞ്ഞില്ല.
