ഐ.എസ്.എല്ലിൽ ഒഡീഷ ഇന്ന് ബംഗളുരുവിനെ നേരിടും.!

ഹീറോ ഇന്ത്യൻ സൂപ്പർ ലീഗിൽ ഇന്ന് ഒഡീഷ ബംഗളുരു പോരാട്ടം. വൈകിട്ട് 7.30 ന് ഒഡീഷയുടെ തട്ടകമായ കലിംഗ സ്റ്റേഡിയത്തിൽ വെച്ചാണ് ഈയൊരു മത്സരം അരങ്ങേറുക. അവസാനം നടന്ന മത്സരത്തിൽ ഒന്നിനെതിരെ 2 ഗോളുകൾക്ക് കേരള ബ്ലാസ്റ്റേഴ്സിനെ പരാജയപ്പെടുത്തിയതിൻ്റെ ആത്മവിശ്വാസത്തിലാണ് ഒഡീഷയുടെ തയ്യാറെടുപ്പ്. ആ മത്സരവും ഇതേ ഗ്രൗണ്ടിൽ തന്നെയായിരുന്നു നടന്നത്. അതേസമയം ബംഗളുരു ഏറ്റവുമൊടുവിൽ നടന്ന മത്സരത്തിൽ എതിരില്ലാത്ത ഒരു ഗോളിന് നിലവിലെ ചാംപ്യൻമാരായ ഹൈദരാബാദിനോട് പരാജയപ്പെടുകയായിരുന്നു. അതിൻ്റെ ക്ഷീണം തീർത്തുകൊണ്ട് ഒരു തിരിച്ചുവരവിന് ആയിരിക്കും ചേത്രിയും സംഘവും ഇന്ന് ശ്രമിക്കുക. ഒഡീഷ നിലവിൽ മികച്ച ഫോമിലാണ് ഉള്ളത്.

3 മത്സരങ്ങളിൽ നിന്നും 2 വിജയങ്ങളുടെ അകമ്പടിയോടെ 6 പോയിൻ്റുമായി ടേബിളിൽ 3ആം സ്ഥാനത്താണ് ഒഡീഷ. മുംബൈ സിറ്റിയോട് മാത്രമാണ് ഡിയേഗോ മൗറീഷ്യോയും സംഘവും പരാജയപ്പെട്ടത്. ഇന്നത്തെ മത്സരത്തിൽ വിജയിച്ചുകൊണ്ട് ടേബിളിൽ ഒന്നാം സ്ഥാനത്തേക്ക് കയറുവാൻ ആകും ആതിഥേയർ ശ്രമിക്കുക. ബംഗളുരു ആകട്ടെ 3 മത്സരങ്ങളിൽ നിന്നും ഓരോ വിജയവും തോൽവിയും സമനിലയുമായി 4 പോയിൻ്റോടെ ടേബിളിൽ 5ആം സ്ഥാനത്താണ് ഉള്ളത്. ഇന്ന് വിജയിക്കാൻ കഴിഞ്ഞാൽ 7 പോയിൻ്റുമായി ടേബിളിൽ ഹൈദരാബാദിനൊപ്പം എത്തുവാൻ അവർക്ക് സാധിക്കും. ഡിയേഗോ മൗറീഷ്യോ നയിക്കുന്ന ഒഡീഷൻ ആക്രമണത്തിന് റോയ് കൃഷണ നയിക്കുന്ന മറു ആക്രമണത്തിലൂടെ ആയിരിക്കും ബംഗളുരു തിരിച്ചടിക്കുക. എന്തായാലും ഈയൊരു പോരാട്ടത്തിനായി നമുക്ക് കാത്തിരിക്കാം.