പ്രീമിയർ ലീഗിൽ ഇന്ന് മാഞ്ചസ്റ്റർ സിറ്റി-ടോട്ടനം സൂപ്പർ പോരാട്ടം

ഇംഗ്ലീഷ് പ്രീമിയർ ലീഗിൽ ഇന്ന് സൂപ്പർ പോരാട്ടം. നിലവിലെ ചാമ്പ്യൻമാരായ മാഞ്ചസ്റ്റർ സിറ്റി ഫോമില്ലാതെ വലയുന്ന ടോട്ടനം ഹോട്ട്സ്‌പറുമായാണ് ഏറ്റുമുട്ടുന്നത്. ഗംഭീര ഫോമിലുള്ള സിറ്റിക്കു തന്നെയാണ് ഇന്നത്തെ മത്സരത്തിൽ മേൽകൈ.

എന്നാൽ മാഞ്ചസ്റ്റർ സിറ്റിക്കെതിരെ പ്രതിരോധ കോട്ട തീർത്ത് കിട്ടുന്ന അവസരങ്ങളിലെല്ലാം അറ്റാക്ക് ചെയ്യാനാവും ഇന്ന് ടോട്ടനം മുതിരുക. പെപ് ഗ്വാർഡിയോളയുടെ ടീം കഴിഞ്ഞ വർഷം ഒക്ടോബർ അവസാനം മുതൽ ഒരു ലീഗ് മത്സരവും തോറ്റിട്ടില്ലെന്ന കരുത്തും അവർക്ക് കൂട്ടായുണ്ട്.

എന്നാൽ മറുവശത്ത് പുതിയ പരിശീലകൻ അന്റോണിയോ കോണ്ടെയുടെ കീഴിൽ ലഭിച്ച മികച്ച തുടക്കത്തിനു ശേഷം ടോട്ടനം പയ്യെ താളം നഷ്‌ടപ്പെട്ടു പോയി. ടീമിന്റെ അവസാന മൂന്ന് ലീഗ് മത്സരങ്ങളിൽ ചെൽസിയോടും സതാംപ്ടണിനോടും അടുത്തിടെ വോൾവ്സിനോടും തോറ്റാണ് ഇന്ന് സിറ്റിക്കെതിരെ ഇറങ്ങുന്നത്.

ടോപ്പ് ഫോറിലെത്താൻ കോണ്ടെയുടെ ടീമിന് ജയവും അനിവാര്യമാണ്. ഇന്നു രാത്രി 11 മണിക്ക് മാഞ്ചസ്റ്റർ സിറ്റിയുടെ ഹോം ഗ്രൗണ്ടായ എത്തിഹാദിലാണ് മത്സരം.