ബെംഗളൂരുവിനെ അട്ടിമറിച്ച് നോർത്ത് ഈസ്റ്റ് യുണൈറ്റഡ്
ഐഎസ്എൽ ഫുട്ബോളിൽ ബെംഗളൂരുവിന്റെ പ്ലേ ഓഫ് സ്വപ്നങ്ങൾ തുലാസിലാക്കി നോർത്ത് ഈസ്റ്റ് യുണൈറ്റഡിന് അട്ടിമറി വിജയം. തോൽവി എന്തായാലും ബ്ലാസ്റ്റേഴ്‌സിനാണ് ഗുണമായതെന്നു പറയാം. ഇന്ന് ജയിച്ചിരുന്നേൽ മികച്ച ഗോൾ ശരാശരിയിൽ കേരളത്തിനെ മറികടന്ന് ബെംഗളൂരു നാലാം സ്ഥാനം കൈയടക്കിയാനെ.
ഒന്നിനെതിരെ രണ്ട് ഗോളുകൾക്കാണ് ബെംഗളൂരു എഫ്‌സിക്കെതിരെ നോർത്ത് ഈസ്റ്റ് യുണൈറ്റഡ് അട്ടിമറി വിജയം സ്വന്തമാക്കിയിരിക്കുന്നത്. ആദ്യ പകുതി ഗോൾ ഒന്നും അടിക്കാതെ ഇരുടീമുകളും പിരിഞ്ഞപ്പോൾ രണ്ടാം പകുതി കെങ്കേമമായിരുന്നു. 66-ാം മിനിറ്റിൽ ക്ലെയ്ടൻ സിൽവയിലൂടെ ബെംഗളൂരുവാണ് മുന്നിലെത്തിയത്.
എന്നാൽ എട്ടു മിനിറ്റുകൾക്കിപ്പുറം ദെഷ്രോൻ ബ്രൗണിലൂടെ നോർത്ത് ഈസ്റ്റ് സമനില പിടിച്ചു. തുടർന്ന് 80-ാം മിനിറ്റിൽ ധൻവാവിയ റാൾട്ടെ അവസാനക്കാർക്കായി വിജയ ഗോൾ നേടി. തോൽവിയോടെ ബെംഗളൂരുവിന്റെ പ്ലേ ഓഫ് സ്വപ്നങ്ങൾക്ക് തിരിച്ചടിയായി.
നിലവിൽ 17 മത്സരങ്ങളിൽ നിന്നായി 23 പോയന്റുമായി പട്ടികയിൽ ആറാം സ്ഥാനത്താണ് ബെംഗളൂരു. 18 പോയന്റുമായി അവസാന സ്ഥാനത്തു നിന്ന് കരകയറി ഒമ്പതാം സ്ഥാനത്തെത്താൻ നോർത്ത് ഈസ്റ്റ് യുണൈറ്റഡിനായി.
