ഐഎസ്എല്ലിൽ ഇന്ന് ഒഡീഷ എഫ്‌സി ചെന്നൈയിൻ എഫ്‌സി പോരാട്ടം
ഐഎസ്എൽ ഫുട്ബോളിൽ ഇന്ന് ഒഡീഷ എഫ്‌സിയും ചെന്നൈയിൻ എഫ്‌സിയും നേർക്കുനേർ ഏറ്റുമുട്ടും. സെമി ഫൈനൽ പ്രതീക്ഷകൾ നിലനിർത്താൻ ഇരുടീമുകൾക്കും ഇന്ന് ജയം അനിവാര്യമാണ്.
നിലവിൽ ഐഎസ്‌എല്ലിലെ പോയിന്റ് ടേബിളിൽ ഒഡീഷ 21 പോയിന്റുമായി ഏഴാം സ്ഥാനത്തും ചെന്നൈയിൻ 19 പോയിന്റുമായി എട്ടാം സ്ഥാനത്തുമാണുള്ളത്. വിരലിലെണ്ണാവുന്ന മത്സരങ്ങൾ മാത്രം ബാക്കിയുള്ളതിനാൽ സമനില പോലും ടീമുകൾക്ക് തോൽവിയായി അനുഭവപ്പെടും.
ചെന്നൈയിന് അവരുടെ കഴിഞ്ഞ നാല് മത്സരങ്ങളിലും വിജയിക്കാൻ സാധിച്ചിട്ടില്ല. മറുവശത്ത് ഒഡീഷയാകട്ടെ അവസാന മത്സരത്തിൽ മുംബൈ സിറ്റിയോട് 4-1ന് പരാജയവും ഏറ്റുവാങ്ങിയിരുന്നു.
പോയ മത്സരത്തിൽ ചെന്നൈയിൻ എഫ്‌സി ഗോവയോട് 5-0 എന്ന സ്കോറിന്റെ വമ്പൻ പരാജയമാണ് ഏറ്റവുവാങ്ങിയത്. അതിനു പിന്നാലെ പരിശീലകൻ ബോസിദാർ ബന്ദോവിച്ചിനെ പുറത്താക്കുകയും ചെയ്‌തിരുന്നു. സഹപരിശീലകന്‍ സയിദ് സബീര്‍ പാഷയ്‌ക്ക് താല്‍ക്കാലിക ചുമതല നല്‍കിയതിനു ശേഷമുള്ള ആദ്യത്തെ മത്സരം കൂടിയാണ് ഇന്നു നടക്കാനിരിക്കുന്നത്.
