ഐഎസ്എല്ലിൽ ഇന്ന് കരുത്തൻമാർ നേർക്കുനേർ; ഹൈദരാബാദ് മോഹൻ ബഗാനെ നേരിടും

ഹീറോ ഇന്ത്യൻ സൂപ്പർ ലീഗിലെ ഇന്നത്തെ മത്സരത്തിൽ കരുത്തൻമാരുടെ പോരാട്ടം. വൈകിട്ട് 7.30-ന് നടക്കുന്ന മത്സരത്തിൽ ഹൈദരാബാദ് എഫ്‌സി എടികെ മോഹൻ ബഗാനെ നേരിടും.

നിലവിൽ 14 കളികളിൽ നിന്നും 26 പോയിന്റുമായി പട്ടികയിൽ ഒന്നാം സ്ഥാനത്തുള്ള ഹൈദരാബാദ് സെമി ഏതാണ്ട് ഉറപ്പിച്ച മട്ടാണ്. അതേസമയം സെമി ഫൈനൽ സാധ്യതകൾ നിലനിർത്താൻ എടികെ മോഹൻ ബഗാന് ഇന്നത്തെ മത്സരത്തിൽ ജയം അനിവാര്യവുമാണ്. 12 കളികൾ മാത്രം കളിച്ച എടികെ 20 പോയിന്റുമായി ഏഴാം സ്ഥാനത്താണ്.

ഇന്ന് ഹൈദരാബാദ് എഫ്‌സിയെ തേൽപ്പിക്കാനായാൽ എടികെ മോഹൻ ബഗാന് നാലാം സ്ഥാനത്തേയ്ക്ക് ഉയരാനുമാവും. കഴിഞ്ഞ അഞ്ച് മത്സരങ്ങളിൽ ഹൈദരാബാദ് എഫ്‌സി മൂന്നെണ്ണം ജയിക്കുകയും ഒന്ന് തോൽക്കുകയും മറ്റൊന്ന് സമനില വഴങ്ങുകയും ചെയ്തു. അതായത് ടീം ഗംഭീര ഫോമിലാണെന്ന് സാരം. അറ്റാക്കിങാണ് ഹൈദരാബാദിന്റെ കുന്തമുന.

അതേസമയം എടികെ മോഹൻ ബഗാന്റെ അവസാന മത്സരം മുംബൈ സിറ്റിയോട് സമനിലയിൽ കലാശിക്കുകയായിരുന്നു. അതിനാൽ വിജയ വഴിയിൽ തിരികെയത്താനാവും ടീം ശ്രമിക്കുക. അവസാന അഞ്ച് മത്സരങ്ങളിൽ തോൽവിയറിഞ്ഞിട്ടില്ലെന്നതും ഇന്നത്തെ മത്സരത്തിൽ കരുത്താകും.