നീലക്കുപ്പായത്തിൽ മെസ്സി അവതരിച്ചു

പി.എസ്, ജി ക്ക് വേണ്ടി മെസ്സി തന്റെ ആദ്യ ഗോൾ നേടിയ മത്സരത്തിൽ ഫ്രഞ്ച് ഭീമന്മാർ മാഞ്ചസ്റ്റർ സിറ്റിയെ എതിരില്ലാത്ത രണ്ടു ഗോളുകൾക്ക് പരാജയപ്പെടുത്തി. ഇഡ്രിസ്സെ ഗയെ ആണ് ഫ്രഞ്ച് ടീമിനായി ഗോൾ നേടിയ മറ്റൊരു താരം. വിജയത്തോടെ ഗ്രൂപ്പിൽ ഒന്നാമത് എത്താനും പാരിസിന് സാധിച്ചിരിക്കുന്നു.

കളിയുടെ 8 ആം മിനുട്ടിൽ തന്നെ ഗയേയിലൂടെ ഫ്രഞ്ച് വമ്പന്മാർ മുന്നിൽ എത്തി. ബോക്സിൽ എത്തിയ ബോൾ ക്ലിയർ ചെയ്യാൻ സിറ്റി അമാന്തിച്ചപ്പോൾ ഗയെ ഒരു തീ പായും ഷോട്ടിലൂടെ സിറ്റിയെ ശിക്ഷിച്ചു. പിന്നീട് അങ്ങോട്ട് സിറ്റി ഗോൾ നേടാൻ കിണഞ്ഞു പരിശ്രമിച്ചു. സ്റ്റെർലിങ്, ബെർണാഡോ സിൽവ എന്നിവരുടെ ശ്രമങ്ങൾ ബാറിൽ തട്ടി പോകുന്നതാണ് പക്ഷെ കണ്ടത്. ഡോണറുമ മല പോലെ നിന്നതും സിറ്റിയുടെ അവസരങ്ങളെ തടഞ്ഞു.

വിജയ നിമിഷം വന്നത് 75 ആം മിനുട്ടിൽ ആണ്. അത് വരെയും തന്റെ സാന്നിധ്യം കളത്തിൽ അറിയിക്കാൻ സാധിക്കാതിരുന്ന മെസ്സിക്ക് ഫ്രീ ആയിട്ട് റൺ ചെയ്യാൻ സാധിക്കുന്നു. മെസ്സി എംബപ്പേക്ക് പാസ് കൊടുക്കുന്നു. ഞൊടിയിടയിൽ കാലിന്റെ പിറകു വശം കൊണ്ട് അദ്ദേഹം മെസ്സിക്ക് ബോൾ തിരിച്ചു നൽകിയപ്പോൾ ഷൂട്ടിങ് സ്പേസ് മെസ്സിക്ക്. താൻ ഇപ്പളും ലോകത്തെ മികച്ച താരം എന്ന് വിളിച്ചോതുന്ന ഒരു ഷോട്ടിലൂടെ മെസ്സി പി.എസ്.ജി ക്ക് വിജയം സമ്മാനിച്ചു. ഗോൾ നേടിയതിന് ശേഷം അത് എംബപ്പേക്ക് സമർപ്പിക്കാനും അദ്ദേഹം മറന്നില്ല.