ലിവര്‍പൂളിന് ഓള്‍ഡ്‌ ട്രഫോര്‍ഡ് ഷോക്ക് നല്‍കി യുണൈറ്റഡ്
തിങ്കളാഴ്ച രാത്രി ഓൾഡ് ട്രാഫോർഡിൽ ലിവർപൂളിനെ 2-1ന് തോൽപ്പിച്ച് മാഞ്ചസ്റ്റർ യുണൈറ്റഡ് പ്രീമിയർ ലീഗ് സീസണിലെ ആദ്യ വിജയം സ്വന്തമാക്കി.ജാഡൻ സാഞ്ചോയുടെയും മാർക്കസ് റാഷ്‌ഫോർഡിന്റെയും ഇരു പകുതികളിലെയും ഗോളുകള്‍ യുണൈറ്റഡിന് മേല്‍ക്കൈ നേടി കൊടുത്തു.മത്സരത്തിൽ ലിവർപൂളിനായി മുഹമ്മദ് സലാഹ് സ്‌കോർ ചെയ്‌തെങ്കിലും അത് വെറുമൊരു ആശ്വാസ ഗോളായി മാത്രം തുടര്‍ന്നു.
റൊണാള്‍ഡോ – ഹാരി മഗ്വയര്‍ എന്നിവര്‍ ഇല്ലാതെ ആണ് യുണൈറ്റഡ് കളിക്കാന്‍ ഇറങ്ങിയത്.സാഞ്ചോയുടെ ഗോള്‍ പതിനാറാം മിനുട്ടില്‍ നേടിയതിനു ശേഷം മികച്ച രീതിയില്‍ ആണ് യുണൈറ്റഡ് പ്രതിരോധിച്ചത്.രണ്ടാം പകുതിയില്‍ ആന്റണി മാർഷ്യലിന്റെ ത്രൂ ബോളിൽ നിന്ന് ഗോള്‍ നേടിയ റാഷ്ഫോര്‍ഡ് ലീഡ് ഇരട്ടിയാക്കിയപ്പോള്‍ ലിവര്‍പൂള്‍ അറ്റാക്കിംഗ് നിര ഒരു മറുപടി ലഭിക്കാതെ പകച്ചു നില്‍ക്കുന്ന കാഴ്ച്ചക്ക് ഓള്‍ഡ്‌ ട്രഫോര്‍ഡ് സാക്ഷിയായി. ഗെയിമിന് മുമ്പ് അമേരിക്കൻ ഉടമകളായ ഗ്ലേസർ കുടുംബത്തിന് കീഴിലുള്ള ക്ലബിന്റെ നടത്തിപ്പില്‍ യുണൈറ്റഡ് ആരാധകരുടെ ഒരു വലിയ സംഘം ഓൾഡ് ട്രാഫോർഡിന് പുറത്ത് പ്രതിഷേധത്തിൽ പങ്കെടുത്തിരുന്നു.
