വിൻസീഡിനെതിരായ പരമ്പരയിൽ ഗെയ്‌ക്‌വാദിന് അവസരം ലഭിക്കണമെന്ന് വസീം ജാഫർ
വെസ്റ്റ് ഇൻഡീസിനെതിരായ ഏകദിന പരമ്പര കളിക്കാൻ റുതുരാജ് ഗെയ്‌ക്‌വാദിന് അവസരം ലഭിക്കണമെന്ന് മുൻ ഇന്ത്യൻ ഓപ്പണർ വസീം ജാഫർ. ഗെയ്ക്ക്‌വാദിന് ഏകദിന അരങ്ങേറ്റത്തിന് അവസരം ഒരുക്കണമെന്നും ക്യാപ്റ്റൻ ശിഖർ ധവാനൊപ്പം ബാറ്റിംഗ് ഓപ്പൺ ചെയ്യാൻ എത്തണമെന്നുമാണ് ജാഫറിന്റെ അഭിപ്രായം.
ഒരു ഓപ്പണർ എന്ന നിലയിൽ റുതുരാജിന്റെ ശക്തമായ ലിസ്റ്റ് എ റെക്കോർഡ് ജാഫർ ചൂണ്ടിക്കാട്ടി. 64 ലിസ്റ്റ് എ മത്സരങ്ങളിൽ നിന്ന് 54.73 ശരാശരിയിലും 100.09 സ്‌ട്രൈക്ക് റേറ്റിലും 3284 റൺസ് നേടി റുതുരാജ് ഗെയ്‌ക്‌വാദ് തന്റെ കഴിവുകൾ തെളിയിച്ചിട്ടുണ്ട്. 2021ലെ വിജയ് ഹസാരെ ട്രോഫിയിൽ ഗെയ്‌ക്‌വാദ് തന്റെ ഏറ്റവും മികച്ച പ്രകടനമാണ് കാഴ്ചവെച്ചത്. കളിച്ച അഞ്ച് ഇന്നിംഗ്‌സുകളിൽ നിന്ന് നാല് സെഞ്ചുറികളാണ് താരം നേടിയത്.
150.75 എന്ന മികച്ച ശരാശരിയിൽ ബാറ്റ് ചെയ്ത അഞ്ച് ഇന്നിംഗ്‌സുകളിൽ നിന്ന് 603 റൺസ് നേടിയ ഗെയ്ക്ക്‌വാദ് ഏറ്റവും കൂടുതൽ റൺസ് നേടുന്ന താരമായാണ് സീസൺ പൂർത്തിയാക്കിയത്. നാല് തവണ ചാമ്പ്യൻമാരായ ചെന്നൈ സൂപ്പർ കിംഗ്‌സിന്റെ 2021 ഐപിഎൽ കിരീട നേട്ടത്തിലും പ്രധാന പങ്ക് വഹിച്ചതിന് ശേഷമാണ് ഗെയ്‌ക്‌വാദ് ശ്രദ്ധേയനാകുന്നത്.
16 കളികളിൽ നിന്ന് 45.35 ശരാശരിയിലും 136.26 സ്‌ട്രൈക്ക് റേറ്റിലും 635 റൺസ് നേടിയ താരം സീസണിലെ ഏറ്റവും കൂടുതൽ റൺസ് നേടുന്ന താരത്തിനായുള്ള ഓറഞ്ച് ക്യാപ്പും സ്വന്തമാക്കിയിരുന്നു. കഴിഞ്ഞ വർഷം ഇന്ത്യയും ശ്രീലങ്കയും തമ്മിലുള്ള ടി20 മത്സരത്തിലാണ് യുവ ബാറ്റ്‌സ്മാൻ തന്റെ അന്താരാഷ്ട്ര അരങ്ങേറ്റം കുറിച്ചത്.
