സസുവോളോയെ കീഴടക്കി കോപ്പ ഇറ്റാലിയ സെമി ഫൈനലിലേക്ക് യുവെന്റസ്

കോപ്പ ഇറ്റാലിയയിൽ സെമി ഫൈനലിലേക്ക് യോഗ്യത നേടി മുൻ ചാമ്പ്യൻമാരായ യുവെന്റസ്. ക്വാർട്ടർ ഫൈനലിൽ സസുവോളോയെ ഒന്നിനെതിരെ രണ്ടു ഗോളുകൾക്ക് കീഴടക്കിയാണ് അയെഗ്രിയുടെ ടീമിന്റെ മുന്നേറ്റം.

മത്സരത്തിൽ മൂന്നാം മിനിറ്റിൽ തന്നെ യുവെന്റസ് ഡിബാലയിലൂടെ ലീഡ് നേടി. എന്നാൽ 24-ാം മിനിറ്റിൽ മുൻ ഇറ്റാലിയൻ ചാമ്പ്യൻമാരെ ഞെട്ടിച്ച് ഹാമെദ് ട്രയോരെയിലൂടെ സസുവോളോ സമനില പിടിച്ചു. മത്സരത്തിൽ പന്ത് കൈവശം വക്കുന്നതിൽ നേരിയ ആധിപത്യം കാണിച്ച സസുവോളോ അവസരങ്ങൾ സൃഷ്ടിക്കുന്നതിലും മികച്ചു നിന്നു.

മത്സരം സമനിലയാകുമെന്ന് തോന്നിച്ച് മുന്നോട്ടു നീങ്ങിയപ്പോഴാണ് 88-ാം മിനിറ്റിൽ ഡിബാലയിൽ നിന്നു ലഭിച്ച പന്തിൽ നിന്നു അവസരം ഉണ്ടാക്കിയെടുത്ത വ്ലാഹോവിച് ഉതിർത്ത ഷോട്ട് റുവാൻ ട്രാസോൽദിയുടെ ദേഹത്ത് തട്ടി യുവെയ്ക്ക് ഗോൾ വീണത്. ജനുവരിയിൽ ടീമിൽ എത്തിയ വ്ലാഹോവിച് ക്വാർട്ടർ ഫൈനലിലും തകർപ്പൻ പ്രകടനമാണ് നടത്തിയത്.

സെമിയിൽ ഫിയറന്റീന ആണ് യുവെന്റസിന്റെ എതിരാളികൾ. ഇത്തവണ ലീഗിൽ കിരീട സാധ്യത ഇല്ലാത്ത യുവെയ്ക്ക് ഇറ്റാലിയൻ കോപ്പ കപ്പിൽ ജയം നേടാൻ ആവും ശ്രമിക്കുക. രണ്ടാം സെമിയിൽ എസി മിലാൻ ഇന്ററിനെയാകും നേരിടുക.