പഞ്ചാബ് എഫ്സി ഫ്രഞ്ച് മിഡ്ഫീൽഡർ മൈക്കൽ മാൽസയെ ടീമിലെത്തിച്ചു
ചണ്ഡീഗഡ്: 2026-27 ഇന്ത്യൻ സൂപ്പർ ലീഗ് സീസണിന് മുന്നോടിയായി, ഫ്രഞ്ച് മിഡ്ഫീൽഡർ മൈക്കൽ റാമോൺ വിൻസെന്റ് മാൽസയെ ടീമിലെത്തിച്ച് പഞ്ചാബ് എഫ്സി തങ്ങളുടെ മധ്യനിര ശക്തിപ്പെടുത്തി. 30-കാരനായ താരം 2027 മെയ് 31 വരെയുള്ള കരാറിലാണ് ഒപ്പുവെച്ചിരിക്കുന്നത്. ലാ ലിഗയിൽ 60-ലധികം മത്സരങ്ങൾ കളിച്ച പരിചയസമ്പത്തും ഫ്രാൻസ്, ബെൽജിയം, നെതർലാൻഡ്സ്, ഗ്രീസ്, സ്പെയിൻ, മൊറോക്കോ എന്നിവിടങ്ങളിലെ ക്ലബ്ബുകളിൽ കളിച്ച അനുഭവസമ്പത്തും അദ്ദേഹത്തിനുണ്ട്.
സ്പെയിനിലെ ലെവാന്റെ യുഡി -ക്കൊപ്പം നാല് സീസണുകൾ ചെലവഴിച്ച മാൽസ, അൽബാസെറ്റെ, റയൽ വല്ലാഡോളിഡ്, സിഡി മിരാൻഡെസ് എന്നീ ക്ലബ്ബുകൾക്കായും കളിച്ചിട്ടുണ്ട്. പ്രതിരോധ ചുമതലകൾക്ക് മുൻഗണന നൽകുന്ന സെൻട്രൽ മിഡ്ഫീൽഡറായ അദ്ദേഹം, പഞ്ചാബ് എഫ്സിയുടെ മധ്യനിരയ്ക്ക് കൂടുതൽ സ്ഥിരതയും പരിചയസമ്പത്തും നൽകുമെന്ന് പ്രതീക്ഷിക്കപ്പെടുന്നു. എഫ്സി സോച്ചോ-മോണ്ട്ബെലിയാർഡിൽ കരിയർ ആരംഭിച്ച അദ്ദേഹം, യുഎസ് അവ്റാൻഷെസ്, റോയൽ ആന്റ്വെർപ്, ഫോർച്യൂണ സിറ്റാർഡ്, പ്ലാറ്റാനിയാസ് തുടങ്ങിയ ക്ലബ്ബുകളെയും പ്രതിനിധീകരിച്ചിട്ടുണ്ട്.
മൊറോക്കോയിലെ വിദാദ് എസി-ക്കുവേണ്ടിയും കളിച്ചിട്ടുള്ള അദ്ദേഹം അന്താരാഷ്ട്ര തലത്തിൽ മാർട്ടിനിക്കിനെയാണ് പ്രതിനിധീകരിക്കുന്നത്. പഞ്ചാബ് എഫ്സിയിൽ ചേരുന്നതിൽ സന്തോഷമുണ്ടെന്നും, ടീമിന്റെ ലക്ഷ്യങ്ങൾ കൈവരിക്കാൻ തന്റെ പരിചയസമ്പത്ത് ഉപയോഗിക്കുമെന്നും മാൽസ പറഞ്ഞു. അക്കാദമി സംവിധാനത്തിലൂടെ യുവ ഇന്ത്യൻ താരങ്ങളെ വളർത്തുന്നതിൽ ശ്രദ്ധ കേന്ദ്രീകരിക്കുന്ന ടീമിന് മാൽസയുടെ വരവ് കൂടുതൽ കരുത്ത് പകരും.
