ലോകക്കപ്പിലെ ആദ്യ ജയം സ്വന്തമാക്കി ഓസ്ട്രേലിയ : ശ്രീലങ്കയെ അഞ്ച് വിക്കറ്റിന് പരാജയപ്പെടുത്തി
തിങ്കളാഴ്ച നടന്ന ഐസിസി ലോകകപ്പ് മത്സരത്തിൽ ഓസ്ട്രേലിയ ശ്രീലങ്കയെ അഞ്ച് വിക്കറ്റിന് പരാജയപ്പെടുത്തി. ബൗളിംഗിന് അയച്ച ഓസ്ട്രേലിയ, ശ്രീലങ്കയെ 43.3 ഓവറിൽ 209 റൺസിന് പുറത്താക്കി, പിന്നീട് 35.2 ഓവറിൽ വിജയലക്ഷ്യം മറികടന്നു.
ഓസ്ട്രേലിയയുടെ ഈ ടൂർണമെന്റിലെ ആദ്യ വിജയമാണിത്. ഓപ്പണർ മിച്ചൽ മാർഷ് 51 പന്തിൽ 52 റൺസ് നേടിയെങ്കിലും ഓസ്ട്രേലിയയ്ക്ക് പെട്ടെന്ന് രണ്ട് വിക്കറ്റ് നഷ്ടമായി. മൂന്നിന് 81 എന്ന നിലയിലേക്ക് അവർ എത്തി. മാർനസ് ലബുഷാഗ്നെ (40), ജോഷ് ഇംഗ്ലിസ് (58) എന്നിവർ 77 റൺസ് കൂട്ടിച്ചേർത്തു. പിന്നീട് ശേഷിച്ച റണ്ണുകൾ ഗ്ലെൻ മാക്സ്വെല്ലും (31) മാർക്കസ് സ്റ്റോയിനിസും (20) ചേർന്ന് നേടി ടീമിനെ വിജയത്തിലേക്ക് നയിച്ചു. ശ്രീലങ്കയ്ക്ക് വേണ്ടി ദിൽഷൻ മധുശങ്ക മൂന്ന് വിക്കറ്റ് വീഴ്ത്തി.
നേരത്തെ, ഓപ്പണർമാരായ പാത്തും നിസ്സാങ്ക (61), കുസൽ പെരേര (78) എന്നിവർ 22 ഓവറിൽ 125 റൺസ് കൂട്ടിച്ചേർത്തുവെങ്കിലും ശ്രീലങ്ക പിന്നീട് തകർന്നടിയുകയായിരുന്നു. 53 റൺസിന് ഒമ്പത് വിക്കറ്റ് ആണ് അവർക്ക് പിന്നീട് നഷ്ടമായത്. ലെഗ് സ്പിന്നർ ആദം സാമ്പ നാല് വിക്കറ്റ് വീഴ്ത്തി, പാറ്റ് കമ്മിൻസും മിച്ചൽ സ്റ്റാർക്കും രണ്ട് വിക്കറ്റ് വീതം വീഴ്ത്തി.
