പെപ്പും പിള്ളേരും ഇന്ന് ലെസ്റ്റർ സിറ്റിയെ നേരിടും.!

ഇംഗ്ലീഷ് പ്രീമിയർ ലീഗിൽ ഇന്ന് സിറ്റികൾ തമ്മിലുള്ള പോരാട്ടം. ഇന്ത്യൻ സമയം വൈകിട്ട് 5 മണിക്ക് ആരംഭിക്കുന്ന മത്സരത്തിൽ നിലവിലെ ചാംപ്യൻമാരായ മാഞ്ചസ്റ്റർ സിറ്റി ലെസ്റ്റർ സിറ്റിയെ നേരിടും. ലെസ്റ്ററിൻെറ മൈതാനമായ കിംഗ് പവർ സ്റ്റേഡിയത്തിൽ വെച്ചാണ് ഈയൊരു മത്സരം അരങ്ങേറുക. നിലവിൽ ആഴ്സനലിനു പിന്നിൽ ടേബിളിൽ 2ആം സ്ഥാനത്താണ് മാഞ്ചസ്റ്റർ സിറ്റിയുള്ളത്. 11 മത്സരങ്ങളിൽ നിന്നും 26 പോയിൻ്റാണ് ടീമിൻ്റെ സമ്പാദ്യം. ഇന്ന് ലെസ്റ്ററിനെ മറികടക്കുവാൻ കഴിഞ്ഞാൽ സിറ്റിക്ക് ഒന്നാം സ്ഥാനത്തേക്ക് കയറുവാൻ കഴിയും. അതേ സമയം ലെസ്റ്റർ നിലവിൽ റെലഗേഷൻ പ്രതിസന്ധിയുടെ വക്കത്താണ്. 12 മത്സരങ്ങൾ പൂർത്തിയാക്കിയ അവർക്ക് 11 പോയിൻ്റുകൾ മാത്രമാണ് നേടുവാൻ കഴിഞ്ഞത്. ഇതിൽ 7 മത്സരങ്ങളും അവർ പരാജയപ്പെട്ടു. 17 ആം സ്ഥാനത്താണ് ഇപ്പോൾ ലെസ്റ്റർ ഉള്ളത്. എന്തായാലും എങ്ങനെയും മാഞ്ചസ്റ്റർ സിറ്റിയെ കീഴടക്കിക്കൊണ്ട് തരംതാഴ്ത്തൽ ഭീഷണിയിൽ നിന്നും രക്ഷപ്പെടുക എന്നതായിരിക്കും ബ്രണ്ടൻ റോഡ്ജേഴ്സിൻ്റെയും സംഘത്തിൻ്റെയും ലക്ഷ്യം. ഏറ്റവുമൊടുവിൽ നടന്ന മത്സരത്തിൽ അവർ വോൾവ്സിനെ എതിരില്ലാത്ത 4 ഗോളുകൾക്ക് പരാജയപ്പെടുത്തിയിരുന്നു. ഈയൊരു ആത്മവിശ്വാസത്തിലാണ് ടീം ഇപ്പോഴുള്ളത്.

മാഞ്ചസ്റ്റർ സിറ്റിയാവട്ടെ സൂപ്പർ താരം ഹാലണ്ടിൻ്റെ ചിറകിലേറി മിന്നും ഫോമിലാണ് കുതിച്ചുകൊണ്ടിരിക്കുന്നത്. ഇന്നും ഹാലണ്ട് കത്തിക്കയറിയാൽ ലെസ്റ്റർ നന്നേ വിയർക്കുമെന്ന് ഉറപ്പാണ്. ഇതിനോടകം തന്നെ 17 ഗോളുകൾ പ്രീമിയർ ലീഗിൽ താരം നേടിക്കഴിഞ്ഞു.
എന്തായാലും 2 സിറ്റികൾ തമ്മിൽ ഇന്ന് കൊമ്പുകോർക്കുമ്പോൾ വിജയം ആർക്കൊപ്പം നിൽക്കുമെന്ന് നമുക്ക് കണ്ടു തന്നെയറിയാം.