ഏകദിന ലോകകപ്പ് യോഗ്യത: 31 റൺസ് ജയത്തോടെ സിംബാബ്വെയെ സ്കോട്ട്ലൻഡ് പുറത്താക്കി
ക്വീൻസ് സ്പോർട്സ് ക്ലബ്ബിൽ നടന്ന 2023 ഏകദിന ലോകകപ്പ് യോഗ്യതാ റൗണ്ടിലെ നിർണായക സൂപ്പർ സിക്സ് മത്സരത്തിൽ മികച്ച ബൗളിംഗ് പ്രകടനത്തിന്റെ പിൻബലത്തിൽ സ്കോട്ട്ലൻഡ് 31 റൺസിന് സിംബാബ്വെയെ തോൽപിച്ചു. ഈ വർഷം അവസാനം ഇന്ത്യയിൽ നടക്കാനിരിക്കുന്ന മെഗാ ഐസിസി ഇവന്റിലേക്ക് എത്താമെന്ന ആതിഥേയരുടെ പ്രതീക്ഷകൾ സ്കോട്ട്ലൻഡ് തകർത്തു. മത്സരത്തിന്റെ സൂപ്പർ സിക്സ് ഘട്ടത്തിലേക്ക് അപരാജിത കുതിപ്പിന് ശേഷം സിംബാബ്വെ, ശ്രീലങ്കയോടും സ്കോട്ട്ലൻഡിനോടും തുടർച്ചയായി തോറ്റതിന് ശേഷം പുറത്തായി.ഇതോടെ, വ്യാഴാഴ്ചത്തെ നെതർലൻഡ്സ്-സ്കോട്ട്ലൻഡ് മത്സരം വെർച്വൽ എലിമിനേറ്ററായി മാറുന്നു, വിജയി ശ്രീലങ്കയ്ക്കൊപ്പം 2023 ക്രിക്കറ്റ് ലോകകപ്പിനായി അവരുടെ സ്ഥാനം ബുക്കുചെയ്യു൦.
ആദ്യം ബാറ്റ് ചെയ്ത സ്കോട്ട്ലൻഡ് 50 ഓവറിൽ 8 വിക്കറ്റ് നഷ്ടത്തിൽ 234 റൺസ് നേടി. മൈക്കൽ ലീസ്ക് 48, മാത്യു ക്രോസ് 38 എന്നിവരുടെ മികവിൽ ആണ് അവർ 234 റൺസ് നേടിയത്. സിംബാബ്വെയ്ക്ക് വേണ്ടി ഷോൺ വില്യംസ് മൂന്ന് വിക്കറ്റ് നേടി. 235 റൺസ് വിജയലക്ഷ്യവുമായി ഇറങ്ങിയ സിംബാബ്വെയെ 41.1 ഓവറിൽ 203 റൺസിന് ഓൾഔട്ടാക്കി സ്കോട്ട്ലൻഡ് 31 റൺസിൻറെ വിജയം സ്വന്താമാക്കി. റയാൻ ബർൾ 83, വെസ്ലി മധെവെരെ 40 എന്നിവർ മാത്രമാണ് ടീമിൽ തിളങ്ങിയത്. ക്രിസ് സോൾ സ്കോട്ട്ലൻഡിനായി മൂന്ന് വിക്കറ്റ് നേടി.
