സെമി പ്രതീക്ഷ കാത്തു, ദക്ഷിണാഫ്രിക്കയെ തകര്‍ത്ത് പാകിസ്ഥാൻ

ട്വന്‍റി 20 ലോകകപ്പിലെ സൂപ്പർ-12ല്‍ മഴ ഒരിക്കല്‍ക്കൂടി കളിച്ച മത്സരത്തില്‍ ദക്ഷിണാഫ്രിക്കയെ 33 റണ്‍സിന് തകർത്ത് പാകിസ്ഥാന്‍. മഴമൂലം 142 റണ്‍സായി പുതുക്കി നിശ്ചയിച്ച വിജയലക്ഷ്യത്തിലേക്ക് ബാറ്റ് വീശിയ ദക്ഷിണാഫ്രിക്കയ്ക്ക് 14 ഓവറില്‍ 9 വിക്കറ്റിന് 108 റണ്‍സെടുക്കാനേ കഴിഞ്ഞുള്ളൂ.

ബാറ്റിംഗില്‍ 22 പന്തില്‍ 52 റണ്‍സെടുത്ത ഷദാബ് ഖാന്‍ രണ്ട് ഓവറില്‍ 16ന് 2 വിക്കറ്റും നേടി മത്സരത്തിലെ മികച്ച താരമായി തെരഞ്ഞെടുക്കപ്പെട്ടു. ഷഹീന്‍ ഷാ അഫ്രീയുടെ മൂന്ന് വിക്കറ്റ് നേട്ടവും ശ്രദ്ധേയമായി. ഒരു ഘട്ടത്തില്‍ ദക്ഷിണാഫ്രിക്ക ഒമ്പത് ഓവറില്‍ നാലിന് 69 റണ്‍സില്‍ നില്‍ക്കെ മഴയെത്തിയതോടെ വിജയലക്ഷ്യം 14 ഓവറില്‍ 142 റണ്‍സായി പുനര്‍നിശ്ചയിക്കുകയായിരുന്നു.

ജയത്തോടെ നാല് കളികളില്‍ നിന്ന് നാല് പോയന്റുമായി പാകിസ്താന്‍ മൂന്നാം സ്ഥാനത്തെത്തി. ഇപ്പോഴും പാക്‌ ടീമിന്റെ സെമി സാധ്യത ഇന്ത്യ, ദക്ഷിണാഫ്രിക്ക ടീമുകളുടെ അവസാന മത്സരഫലം അനുസരിച്ചാണ്. 19 പന്തില്‍ ഒരു സിക്‌സും നാല് ഫോറുമടക്കം 36 റണ്‍സെടുത്ത ക്യാപ്റ്റന്‍ ടെംബ ബവുമയാണ് ദക്ഷിണാഫ്രിക്കയുടെ ടോപ് സ്‌കോറര്‍.