ഡോർട്ട്മുണ്ടിനെ ഞെട്ടിച്ച് റേഞ്ചേഴ്സ്, ജയം രണ്ടിനെതിരെ നാല് ഗോളുകൾക്ക്
യൂറോപ്പ ലീഗിൽ ജർമൻ വമ്പൻമാരായ ബൊറുസിയ ഡോർട്ട്മുണ്ടിനെതിരെ വമ്പൻ വിജയവുമായി സ്കോട്ടിഷ് ടീമായ റേഞ്ചേഴ്സ് എഫ്‌സി. രണ്ടിനെതിരെ നാല് ഗോളുകളുടെ മിന്നും ജയമാണ് ആദ്യ പാദ മത്സരത്തിൽ ടീം സ്വന്തമാക്കിയിരിക്കുന്നത്.
38-ാം മിനിറ്റിൽ തുടങ്ങിവെച്ച ഗോളടി പൂരമാണ് മത്സരത്തിന്റെ ബാക്കിയുള്ള നിമിഷങ്ങൾ സാക്ഷ്യംവഹിച്ചത്. ജെയിംസ് ടാവെർനിയർ, ആൽഫ്രെഡോ മൊരെലെസ്, ജോൺ ലണ്ട്സ്ട്രാം എന്നിവർ റേഞ്ചേഴ്സിന് വേണ്ടി ഗോളടിച്ചപ്പോൾ സെൽഫ് ഗോളുമായി ഡാൻ ആക്‌സൽ സഗഡൗ റേഞ്ചേഴ്‌സിനെ സഹായിച്ചു.
അതേസമയം ജൂഡ് ബെല്ലിംഗ്ഹാമും റാഫയേൽ ഗറേറൊയുമാണ് ബൊറൂസിയ ഡോർട്ട്മുണ്ടിന്റെ ആശ്വാസ ഗോളുകൾ നേടിയത്. ബുണ്ടസ് ലീഗയിലെ രണ്ടാം സ്ഥാനക്കാരായ ബൊറൂസിയയെ അവരുടെ മൈതാനത്ത് വീഴ്ത്തി യൂറോപ്പ ലീഗിൽ വരവറിയിച്ചിരിക്കുകയാണ് റേഞ്ചേഴ്സ്. ഇതോടെ രണ്ടാം പാദത്തിൽ സ്കോട്ടിഷ് ക്ലബിന് മേൽകൈ നേടാനും സാധിച്ചു.
