ഈസ്റ്റ് ബംഗാളിനെ തോല്‍പ്പിച്ച് ബ്ലാസ്റ്റേഴ്സ് പോയിന്റ് പട്ടികയില്‍ മൂന്നാമത്
ഐഎസ്എൽ ഫുട്ബോളിൽ കേരള ബ്ലാസ്റ്റേഴ്‌സിന് ജയം. ഇന്നലെ ഈസ്റ്റ് ബംഗാളിനെതിരെ നടന്ന മത്സരത്തിൽ മറുപടിയില്ലാത്ത ഒരു ഗോളിനാണ് കൊമ്പൻമാരുടെ ജയം.
ഈസ്റ്റ് ബംഗാളിനെതിരായ വിജയത്തോടെ പോയിന്റ് പട്ടികയില്‍ അഞ്ചാം സ്ഥാനത്തു നിന്ന് മൂന്നാം സ്ഥാനത്തേയ്ക്ക് ഉയരാനും ബ്ലാസ്റ്റേഴ്‌സിന് സാധിച്ചിട്ടുണ്ട്. ആദ്യ പകുതിയില്‍ ബ്ലാസ്റ്റേഴ്‌സിന്റെ ആധിപത്യം കണ്ടെങ്കിലും നല്ല അവസരങ്ങള്‍ സൃഷ്ടിക്കാന്‍ കഴിയാതെ പോയത് നിരാശയുളവാക്കി.
എന്നാൽ രണ്ടാം പകുതിയിൽ 49-ാം മിനിറ്റില്‍ എനസ് സിപോവിച്ചാണ് കേരള ബ്ലാസ്റ്റേഴ്‌സിനായി വിജയ ഗോൾ നേടി. മത്സരത്തിൽ മികച്ച് നിന്നതും കൊമ്പൻമാർ തന്നെയായിരുന്നു. ഇന്നലെത്തെ ജയത്തോടെ സെമി സാധ്യതകൾ നിലനിർത്താനും ടീമിനായിട്ടുണ്ട്.
നിലവിൽ 15 മത്സരങ്ങളില്‍ നിന്ന് 26 പോയിന്റാണ് ബ്ലാസ്‌റ്റേഴ്‌സിനുള്ളത്. അതേസമയം 17 മത്സരങ്ങളില്‍ 10 പോയിന്റ് മാത്രമുള്ള ഈസ്റ്റ് ബംഗാള്‍ 10-ാം സ്ഥാനത്താണ്. അവരുടെ സെമി ഫൈനൽ പ്രതീക്ഷകൾ നേരത്തെ തന്നെ അവസാനിച്ചിരുന്നു.
