യൂറോ 2024: റൊമാനിയയെ തോൽപ്പിച്ച് ക്വാര്‍ട്ടര്‍ ഫൈനലില്‍ ഇടം നേടി ഡച്ച് ടീം
ഇന്നലെ നടന്ന റൌണ്ട് ഓഫ് 16 പോരാട്ടത്തില്‍ ഡച്ച് ടീം റൊമേനിയയെ പരാജയപ്പെടുത്തി ക്വാര്‍ട്ടര്‍ ഫൈനലില്‍ ഇടം നേടി.എതിരില്ലാത്ത മൂന്നു ഗോളിന് ആണ് അവര്‍ ജയം രേഖപ്പെടുത്തിയത്.കഴിഞ്ഞ മല്‍സരത്തില്‍ ഓസ്ട്രിയക്കെതിരെ പരാജയപ്പെട്ടപ്പോള്‍ അവരുടെ മാധ്യമങ്ങളില്‍ നിന്നും ആരാധകരില്‍ നിന്നും ഏറെ അപഹാസ്യം കേള്‍ക്കേണ്ടി വന്നിട്ടുണ്ട് ഡച്ച് ടീമിന്.അതിനെല്ലാം തികഞ്ഞ ഒരു മറുപടി തന്നെ ആണ് ഇന്നലെ അവര്‍ നല്കിയത്.
മല്‍സരത്തിന്റെ തുടക്കത്തില്‍ കളിയുടെ നിയന്ത്രണം റൊമേനിയന്‍ ടീമിന്റെ കൈയ്യില്‍ ആയിരുന്നു.അവര്‍ പതുക്കെ ആണ് എങ്കിലും ഡച്ച് ടീമിനെ പ്രതിരോധത്തില്‍ ആഴ്ത്തി.എന്നാല്‍ ഡച്ച് ടീമിന് 20 ആം മിനുട്ടില്‍ ലീഡ് നല്കി കൊണ്ട് ഈ യൂറോയിലെ മൂന്നാം ഗോള്‍ കോഡി ഗാക്ക്പ്പോ നേടി.ആ ഒരു ഗോളില്‍ പിന്നീട് അങ്ങോട്ട് കടിച്ച് തൂങ്ങുകയായിരുന്നു ഹോളണ്ട്. എന്നാല്‍ 83 ആം മിനുട്ടില്‍ സബ് ആയി ഇറങ്ങിയ ഡോണി മാലെന്‍ ഡച്ച് ടീമിന് വേണ്ടി രണ്ടാമത്തെ ഗോള്‍ നേടി.93 ആം മിനുട്ടില്‍ ഒരു കൌണ്ടര്‍ അറ്റാക്കിലൂടെ ഡച്ച് ടീമിന് വേണ്ടി മൂന്നാം ഗോള്‍ നേടി കൊണ്ട് മാലെന്‍ രണ്ടാമതും സ്കോര്‍ബോര്‍ഡില്‍ ഇടം നേടി.
