അടി തിരിച്ചടി; ഒടുവിൽ സമനിലയിൽ പിരിഞ്ഞ് ജംഷഡ്പൂരും, ചെന്നൈയിനും.!

ഹീറോ ഇന്ത്യൻ സൂപ്പർ ലീഗിൽ നടന്ന അതിവാശിയേറിയ ജംഷഡ്പൂർ-ചെന്നൈയിൻ പോരാട്ടം ഒടുവിൽ സമനിലയിൽ പിരിഞ്ഞു. ജംഷഡ്പൂരിൻ്റെ തട്ടകമായ ജെ.ആർ.ഡി ടാറ്റ കോംപ്ലക്സ് സ്റ്റേഡിയത്തിൽ നടന്ന മത്സരത്തിൽ 2 ഗോളിന് മുന്നിൽ നിന്നതിനു ശേഷമാണ് ആതിഥേയർ സമനില വഴങ്ങിയത്. മത്സരത്തിൻ്റെ 17,56 മിനിറ്റുകളിൽ ഋത്വിക് ദാസിലൂടെ ജംഷഡ്പൂർ 2-0ന് മുന്നിൽ എത്തിയതാണ്.

 

എന്നാൽ വിജയം പ്രതീക്ഷിച്ച ആതിഥേയരെ നിഷ്പ്രഭമാക്കിക്കൊണ്ട് ചെന്നൈയിൻ 2 ഗോളുകൾ തിരിച്ചടിക്കുകയായിരുന്നു. 60ആം മിനിറ്റിൽ വിൻസി ബാരെറ്റോയും, 68ആം മിനിറ്റിൽ പീറ്റർ സ്ലിസ്കോവിച്ചുമാണ് സന്ദർശകർക്കായി വലകുലുക്കിയത്. അതോടെ മത്സരം 2-2 എന്ന നിലയിലായി. ശേഷിച്ച സമയം വിജയഗോൾ കണ്ടെത്തുവാനായി ഇരുടീമുകളും ആവുന്നത്ര പരിശ്രെമിച്ചെങ്കിലും ഫലമുണ്ടായില്ല. ഒടുവിൽ മത്സരം സമനിലയിൽ പിരിയുകയായിരുന്നു. രണ്ട് ഗോളുകൾക്ക് മുന്നിൽ നിന്നിട്ടും വിജയിക്കാൻ കഴിയാതിരുന്നത് ജംഷഡ്പൂരിന് നിരാശയായി.

അതേസമയം പിന്നിലായി പോയിട്ടും മനോഹരമായി തിരിച്ചുവന്ന ചെന്നൈയിന് അഭിമാനിക്കാം. ഇതോടെ 12 മത്സരങ്ങളിൽ നിന്നും 15 പോയിൻ്റുമായി ചെന്നൈയിൻ 7ആം സ്ഥാനത്തും, 13 മത്സരങ്ങൾ പൂർത്തിയാക്കിയ ജംഷഡ്പൂർ കേവലം 6 പോയിൻ്റുമായി 10ആം സ്ഥാനത്തും തുടരുകയാണ്.