പീഡനക്കേസില്‍ അറസ്റ്റ്; ധനുഷ്‌ക ഗുണതിലകയെ സസ്പെൻഡ് ചെയ്‌ത് ശ്രീലങ്ക
ടി20 ലോകകപ്പിനുള്ള ശ്രീലങ്കന്‍ ക്രിക്കറ്റ് ടീമില്‍ അംഗമായിരുന്ന ധനുഷ്‌ക ഗുണതിലക ഓസ്ട്രേലിയയില് പീഡനക്കേസില്‍ അറസ്റ്റിലായതിനെ തുടർന്ന് കടുത്ത നടപടി സ്വീകരിച്ച് ശ്രീലങ്കൻ ക്രിക്കറ്റ് ബോർഡ്. താരത്തെ സസ്‌പെന്‍ഡ് ചെയ്യാന്‍ ശ്രീലങ്കന്‍ ക്രിക്കറ്റ് തീരുമാനിച്ചെന്നാണ് ഔദ്യോഗിക സ്ഥിരീകരണം.
ഞായറാഴ്ച്ച പുലര്‍ച്ചെയാണ് സിഡ്നി പൊലീസ് ധനുഷ്‌ക ഗുണതിലകയുടെ അറസ്റ്റ് രേഖപ്പെടുത്തിയത്. ഈ മാസം രണ്ടിനായിരുന്നു അറസ്റ്റിന് ആസ്പദമായ സംഭവം. ലോകകപ്പില്‍ നിന്ന് പുറത്തായ ശ്രീലങ്ക കഴിഞ്ഞ ദിവസം ഓസ്ട്രേലിയയില് നിന്ന് തിരിച്ചിരുന്നു.
ക്രിക്കറ്റിലെ എല്ലാ ഫോര്‍മാറ്റില്‍ നിന്നും ധനുഷ്‌ക ഗുണതിലകയെ സസ്‌പെന്‍ഡ് ചെയ്യാനാണ് തീരുമാനം. വരുന്ന ഒരു മത്സരങ്ങള്‍ക്കും അദ്ദേഹത്തിന്റെ പേര് പരിഗണിക്കില്ല. ഓസ്ട്രേലിയയില് 29കാരിയെ ലൈംഗികമായി പീഡിപ്പിച്ചെന്ന പരാതിയെ തുടര്‍ന്ന് താരം അറസ്റ്റ് ചെയ്യപ്പെട്ടിരുന്നു. ഇതിനെ തുടര്‍ന്നാണ് തീരുമാനം. എന്നാണ് ശ്രീലങ്കന്‍ ക്രിക്കറ്റിന്റെ ഔദ്യോഗിക പ്രസ്താവന.
ശനിയാഴ്ച, ഇംഗ്ലണ്ടിനോട് തോറ്റതിനു പിന്നാലെ ശ്രീലങ്ക ടി20 ലോകകപ്പില്‍നിന്നു പുറത്തായിരുന്നു. ഇടങ്കയ്യന്‍ ബാറ്ററായ ഗുണതിലക സൂപ്പര്‍ 12ന് മുമ്പ് നടന്ന മത്സരങ്ങളില്‍ മാത്രമാണ് കളിച്ചത്. നമീബിയയ്‌ക്കെതിരെ നടന്ന ശ്രീലങ്കയുടെ ആദ്യ ലോകകപ്പ് മത്സരത്തില്‍ ഗോള്‍ഡന്‍ ഡക്കായി പുറത്തായിരുന്നു. പിന്നീട് പരിക്കിനെ തുടര്‍ന്ന് താരത്തെ ഒഴിവാക്കുകയും ചെയ്‌തിരുന്നു.
