ടി20 ലോകകപ്പില്‍ അപൂര്‍വ റെക്കോര്‍ഡ് സ്വന്തമാക്കി ദക്ഷിണാഫ്രിക്കയുടെ റിലീ റൂസോ
ടി20 ലോകകപ്പില്‍ ബംഗ്ലാദേശിനെ തകർത്തെറിഞ്ഞ മത്സരത്തിൽ അപൂര്‍വ റെക്കോര്‍ഡും സ്വന്തമാക്കി വെടിക്കെട്ട് ബാറ്റിംഗുമായി തിളങ്ങിയ ദക്ഷിണാഫ്രിക്കയുടെ റിലീ റൂസോ. ടി20 ക്രിക്കറ്റില്‍ തുടര്‍ച്ചയായി രണ്ട് സെഞ്ചുറി നേടുന്ന രണ്ടാമത്തെ മാത്രം ബാറ്ററെന്ന റെക്കോര്‍ഡാണ് താരം സ്വന്തം പേരിൽ കുറിച്ചിരിക്കുന്നത്.
ടി20 ക്രിക്കറ്റില്‍ റൂസോയുടെ തുടര്‍ച്ചയായ രണ്ടാം സെഞ്ചുറിയാണിത്. നേരത്തെ ഇന്ത്യക്കെതിരായ ടി20 പരമ്പരയില്‍ സെഞ്ചുറി നേടിയ റൂസോ ബംഗ്ലാദേശിനെതിരെയും സെഞ്ചുറി നേടിയതോടെയാണ് ഈ അപൂർവ റെക്കോഡിന് ഉടമയാവാൻ സഹായിച്ചത്. 2022-ല്‍ ഫ്രാന്‍സിന്‍റെ ഗുസ്താവ് മക്കോണ്‍ മാത്രമാണ് റൂസോക്ക് മുമ്പ് ടി20 ക്രിക്കറ്റില്‍ തുടര്‍ച്ചയായി സെഞ്ചുറി നേടിയിട്ടുള്ള ഏക ബാറ്റര്‍.
ബംഗ്ലാദേശിനെതിരെ രണ്ടാം വിക്കറ്റില്‍ 158 റണ്‍സിന്‍റെ കൂട്ടുകെട്ടുയര്‍ത്തിയ റൂസോ ക്വിന്‍റണ്‍ ഡീ കോക്ക് സഖ്യം ലോകകപ്പിലെ ദക്ഷിണാഫ്രിക്കയുടെ ഏറ്റവും മികച്ച കൂട്ടുകെട്ടിന്‍റെ റെക്കോര്‍ഡും പേരിലാക്കി. 2007-ലെ ആദ്യ ലോകകപ്പില്‍ ഹെര്‍ഷെല്‍ ഗിബ്സും ജസ്റ്റിന്‍ കെംപും ചേര്‍ന്ന് പിരിയാതെ 120 റണ്‍സ് അടിച്ചതായിരുന്നു ലോകകപ്പില്‍ ദക്ഷിണാഫ്രിക്കയുടെ ഏറ്റവും ഉയര്‍ന്ന കൂട്ടുകെട്ട്.
