കൗണ്ടി ക്രിക്കറ്റിലേക്ക് മുൻ ഇന്ത്യൻ ടെസ്റ്റ് വൈസ് ക്യാപ്റ്റൻ അജിങ്ക്യ രഹാനെയും

കൗണ്ടി ക്രിക്കറ്റിലേക്ക് മുൻ ഇന്ത്യൻ ടെസ്റ്റ് വൈസ് ക്യാപ്റ്റൻ അജിങ്ക്യ രഹാനെയും എത്തിയേക്കും. 2023 സീസണിനായി ലെസ്റ്റർഷെയറുമായി താരം കരാർ ഒപ്പിട്ടതായാണ് പുറത്തുവരുന്ന പുതിയ വാർത്തകൾ. കൗണ്ടി ചാമ്പ്യൻഷിപ്പുകളിലും ഏകദിന കപ്പ് ടൂർണമെന്റിലും പങ്കെടുക്കാനാണ് രഹാനെയെ ലെസ്റ്റർഷെയർ തെരഞ്ഞെടുത്തിരിക്കുന്നത്.

ഈ വർഷം ജനുവരിയിൽ നടന്ന ദക്ഷിണാഫ്രിക്കൻ പരമ്പരയ്ക്ക് ശേഷം രഹാനെ ഇന്ത്യക്കായി ടെസ്റ്റ് ടീം കുപ്പായം അണിഞ്ഞിട്ടില്ല. അതേ സമയം അടുത്ത ഇന്ത്യൻ പ്രീമിയർ ലീഗ് (ഐ‌പി‌എൽ) പ്രതിബദ്ധതകളും രഹാനെയ്‌ക്കുണ്ട്. എന്നാൽ ഫോമിലല്ലാത്ത താരത്തെ കൊൽക്കത്ത നൈറ്റ് റൈഡേഴ്‌സ് (കെകെആർ) നിലനിർത്തുമോ ഇല്ലയോ എന്നത് കണ്ടറിയണം. ഈ വർഷം ആദ്യം നടന്ന ഐപിഎൽ 2022 മെഗാ ലേലത്തിൽ രണ്ട് തവണ ജേതാക്കളായ കെകെആർ രഹാനെയെ ഒരു കോടി രൂപയ്ക്കാണ് ടീമിലെത്തിച്ചത്.

2022 കൗണ്ടി ചാമ്പ്യൻഷിപ്പ് സീസണിൽ ലെസെസ്റ്റർഷെയർ മോശം പ്രകടനമാണ് കാഴ്ച്ചവെച്ചത്. 14 മത്സരങ്ങളിൽ നിന്ന് 93 പോയിന്റുമായി ഫിനിഷ് ചെയ്യുകയും ഏഴാം സ്ഥാനത്തുള്ള സസെക്സിനേക്കാൾ (128) 35 പോയിന്റ് പിന്നിലായുമാണ് ടീം സീസൺ അവസാനിപ്പിച്ചത്.