വിൻഡീസിനെതിരായ ടി20 പരമ്പര, ഇന്ത്യന്‍ ടീമിന്റെ വൈസ് ക്യാപ്റ്റനായി റിഷഭ് പന്ത്

വെസ്റ്റ് ഇന്‍ഡീസിനെതിരായ ടി20 പരമ്പരയില്‍ ഇന്ത്യന്‍ ടീമിന്റെ വൈസ് ക്യാപ്റ്റനായി റിഷഭ് പന്തിനെ ചുമതലപ്പെടുത്തി ബിസിസിഐ. പരിക്കേറ്റ കെഎല്‍ രാഹുലിന് പരമ്പര നഷ്ടമാകുന്ന സാഹചര്യത്തിലാണ് വിക്കറ്റ് കീപ്പര്‍ ബാറ്റ്‌സ്മാന്‍ പന്തിനെ രണ്ടാമനായി നിയമിച്ചിരിക്കുന്നത്.

ഐപിഎല്ലില്‍ ഡല്‍ഹി ക്യാപ്പിറ്റല്‍സിനെ നയിച്ചിട്ടുള്ള യുവതാരം റിഷഭ് പന്ത് തനിക്ക് നായക സ്ഥാനത്ത് തിളങ്ങാനാകുമെന്ന് നേരത്തെ തെളിയിച്ചിട്ടുള്ളതാണ്. വിൻഡീസിനെതിരായ മൂന്ന് മത്സരങ്ങളടങ്ങിയ ട്വന്റി 20 പരമ്പരയിലെ ആദ്യ മത്സരം ഫെബ്രുവരി 16-ന് കൊല്‍ക്കത്തയിൽ ആരംഭിക്കും. നേരത്തെ മൂന്നു മത്സരങ്ങളടങ്ങിയ ഏകദിന പരമ്പര ടീം ഇന്ത്യ 3-0ന് സ്വന്തമാക്കിയിരുന്നു.

ഫെബ്രുവരി 16, 18, 20 തീയതികളിൽ കൊൽക്കത്തയിലെ ഈഡൻ ഗാർഡൻസിലാണ് മൂന്ന് ടി20 മത്സരങ്ങളും നടക്കുക. പരിക്കു മൂലം വാഷിംഗ്ടൺ സുന്ദറിനെ ടി20യിൽ നിന്ന് ഒഴിവാക്കി പകരം കുൽദീപ് യാദവിനെ ഇന്ത്യ ടീമിലെത്തിച്ചിട്ടുണ്ട്.