വസീം ജാഫറിനെ ബാറ്റിംഗ് പരിശീലകനായി പുനർനിയമിച്ച് പഞ്ച് കിംഗ്‌സ്
മുൻ ഇന്ത്യൻ ഓപ്പണർ വസീം ജാഫറിനെ പഞ്ചാബ് കിംഗ്‌സ് ഫ്രാഞ്ചൈസിയുടെ ബാറ്റിംഗ് പരിശീലകനായി പുനർനിയമിച്ചു. 2022 ഐപിഎൽ സീസണിന് മുന്നോടിയായി ഇതേ റോൾ ജാഫർ രാജിവെച്ചിരുന്നു, ജാഫറിനെ കൂടാതെ, പഞ്ചാബ് കിംഗ്‌സ് ഫ്രാഞ്ചൈസി ചാൾ ലാംഗവെൽഡിനെയും ബ്രാഡ് ഹാഡിനെയും ടീമിന്റെ കോച്ചിംഗ് സ്റ്റാഫിൽ ഉൾപ്പെടുത്തിയിട്ടുണ്ട്.
ഇതിനു മുമ്പ് രണ്ട് സീസണുകളിൽ ടീമിനൊപ്പം ജാഫർ പ്രവർത്തിച്ചിട്ടുണ്ട്. ജാഫർ ഇതുവരെയുള്ള തന്റെ പരിശീലക ജീവിതത്തിൽ ഒഡീഷ രഞ്ജി ടീമിലും ബംഗ്ലാദേശ് അണ്ടർ 19 ടീമിലും പ്രവർത്തിച്ചിട്ടുണ്ട്. വരും സീസണിൽ പ്രകടനം മെച്ചപ്പെടുത്താനുള്ള ശ്രമത്തിൽ പഞ്ചാബ് കിംഗ്‌സ് വൻ അഴിച്ചുപണിയാണ് ടീമിൽ നടത്തുന്നത്.
കരാർ പുതുക്കേണ്ടതില്ലെന്ന് തീരുമാനിച്ചതിനെ തുടർന്ന് മുൻ പരിശീലകൻ അനിൽ കുംബ്ലെയെ ഉപേക്ഷിച്ച് സെപ്റ്റംബറിൽ ട്രെവർ ബെയ്‌ലിസിനെ മുഖ്യ പരിശീലകനായി നിയമിച്ചു. മാത്രമല്ല, ഡിസംബറിലെ ലേലത്തിന് മുന്നോടിയായി ക്യാപ്റ്റൻ മായങ്ക് അഗർവാളിനെ ടീമിൽ നിന്ന് ഒഴിവാക്കി പുതിയ നായകനായി ശിഖർ ധവാനെ നിയമിക്കുകയും ചെയ്‌തിരുന്നു.
