ജിറൂഡിന്റെ ഇരട്ടഗോളിൽ ലാസിയോയെ തകർത്ത് എസി മിലാൻ കോപ്പ ഇറ്റാലിയ സെമിയിൽ

ബുധനാഴ്ച്ച നടന്ന ഇറ്റാലിയൻ കപ്പ് ക്വാർട്ടർ ഫൈനലിൽ ലാസിയോയെ 4-0ന് മറികടന്ന് എസി മിലാൻ. ഇന്റർ മിലാനെതിരായ സീരി എ മത്സരത്തിൽ വിജയ ഗോൾ നേടിയ ഒലിവിയർ ജിറൂഡിന്റെ ഇരട്ട ഗോളാണ് ഇവിടെയും ടീമിന് കരുത്തായത്.

24-ാം മിനിറ്റിൽ റാഫേൽ ലിയോയാണ് എസി മിലാന് ബ്രേക്ക് ത്രൂ നൽകിയത്. തുടർന്ന് 41-ാം മിനിറ്റിലാണ് മികച്ച ഫോമിലുള്ള ഫ്രഞ്ച് സ്‌ട്രൈക്കർ സ്കോറിംഗിന് തുടക്കമിട്ടത്. ആദ്യ പകുതിയുടെ ഇഞ്ചുറി ടൈമിൽ ലീഡ് ജിറൂഡ് മൂന്നായി ഉയർത്തിയതോടെ എസി മിലാൻ വിജയം ഉറപ്പിച്ചു കഴിഞ്ഞിരുന്നു.

സ്റ്റെഫാനോ പിയോലിയുടെ കീഴിൽ പുതുജീവൻ ആർജിച്ച എസി മിലാൻ ഫ്രാങ്ക് കെസിയിലൂടെ ലാസിയോയുടെ നെഞ്ചത്ത് 79-ാം മിനിറ്റിൽ അവസാന ആണിയും അടിച്ചു. കോപ്പ ഇറ്റാലിയയുടെ സെമി ഫൈനലിൽ ഇന്റർ മിലാനുമായാകും എസി മിലാൻ ഏറ്റുമുട്ടുക. ക്വാർട്ടറിൽ ജോസെ മൊറീഞ്ഞോയുടെ എഎസ് റോമയെ 2-0ന് കീഴടക്കിയാണ് ഇന്റർ സെമിയിലേക്ക് കടന്നുവരുന്നത്.

നിലവിൽ സീരി എയിൽ മികച്ച ഫോമിലുള്ള രണ്ട് ടീമുകളാണ് ഇന്ററും മിലാനും. 24 മത്സരങ്ങളിൽ നിന്നും 52 പോയിന്റുമായി എസി മിലാൻ മൂന്നാം സ്ഥാനത്ത് നിൽക്കുമ്പോൾ 23 കളികളിൽ നിന്നായി 53 പോയിന്റുമായി നിലവിലെ ചാമ്പ്യൻമാരായ ഇന്ററാണ് ഒന്നാം സ്ഥാനത്ത്.എ