ഹൈദരാബാദിനെ പൂട്ടി മോഹൻ ബഗാൻ, ജയം ഒന്നിനെതിരെ രണ്ട് ഗോളുകൾക്ക്

ഐഎസ്എൽ ഫുട്ബോളിൽ കരുത്തരായ ഹൈദരാബാദ് എഫ്‌സിയെ പരാജയപ്പെടുത്തി എടികെ മോഹൻ ബഗാന്റെ കുതിപ്പ്. ഇന്നലെ നടന്ന മത്സരത്തിൽ ഒന്നിനെതിരെ രണ്ടു ഗോളുകൾക്കായിരുന്നു മോഹൻ ബഗാന്റെ വിജയം.

ഗോൾരഹിതമായ ആദ്യ പകുതിക്ക് ശേഷം രണ്ടാം പകുതിയിലാണ് മത്സരത്തിലെ മൂന്ന് ഗോളുകളും പിറന്നത്. 56-ാം മിനിറ്റിൽ ലിസ്റ്റൻ കൊളാക്കോയിലൂടെ മുന്നിലെത്തിയെ എടികെ മോഹൻ ബഗാൻ മൂന്നു മിനിറ്റുകൾക്ക് ശേഷം വീണ്ടും മൻവിർ സിങിലൂടെ ലീഡ് വർധിപ്പിച്ചു.

എന്നാൽ 67-ാം മിനിറ്റിൽ ഒന്നാം സ്ഥാനക്കാരുടെ വീര്യം പുറത്തെടുത്തെ ഹൈദരാബാദ് എഫ്‌സി ജോയൽ ചിയാനെസിലൂടെ ഒരു ഗോൾ മടക്കിയെങ്കിലും മോഹൻ ബഗാന്റെ വല കുലുക്കാൻ ഹൈദരാബാദിന് പിന്നീട് സാധിച്ചില്ല. ജയത്തോടെ എടികെ മോഹൻ ബഗാൻ 13 മത്സരങ്ങളിൽ നിന്ന് 23 പോയിന്റുമായി നാലാം സ്ഥാനത്തേയ്ക്ക് ഉയർന്നു. 15 കളിയിൽ നിന്നും 26 പോയിന്റുമായി ഹൈദരാബാദ് തന്നെയാണ് ഒന്നാമത്.

എന്തായാലും മത്സര ഫലം കേരള ബ്ലാസ്റ്റേഴ്സിന് അനുകൂലമാണ്. കൈയ്യിലുള്ള അടുത്ത രണ്ട് മത്സരങ്ങളും വിജയിച്ചാൽ ബ്ലാസ്റ്റേഴ്സിന് ഹൈദരബാദിനെ മറികടന്ന് ഒന്നാം സ്ഥാനം തിരിച്ചു പിടിക്കാൻ ആകുമെന്നതാണ് നേട്ടം.