ലേലത്തിൽ കണ്ണുടക്കുമോ? പാകിസ്ഥാൻ സൂപ്പർ ലീഗിൽ ജേസൺ റോയിയുടെ വെടിക്കെട്ട് ബാറ്റിംഗ്
ഐപിഎൽ മെഗാ ലേലത്തിന് ദിവസങ്ങൾ മാത്രം ബാക്കി നിൽക്കുമ്പോൾ ജേസൺ റോയിയുടെ വെടിക്കെട്ട് ഇന്നിംഗ്‌സ്. പാക്കിസ്ഥാന്‍ സൂപ്പര്‍ ലീഗിലാണ് ഇംഗ്ലണ്ട് താരത്തിന്റെ മിന്നും പ്രകടനം.
പാകിസ്ഥാൻ സൂപ്പർ ലീഗിൽ (പിഎസ്എൽ) തിങ്കളാഴ്ച്ച നടന്ന മത്സരത്തിൽ ജേസൺ റോയിയുടെ തകർപ്പൻ സെഞ്ചുറിയുടെ കരുത്തിൽ ക്വെറ്റ ഗ്ലാഡിയേറ്റേഴ്‌സിന് ലാഹോർ ക്വലാൻഡേഴ്സിനെതിരെ ഏഴ് വിക്കറ്റ് ജയവും സ്വന്തമാക്കി. റാഷിദ് ഖാൻ, ഷഹീൻ ഷാ അഫ്രീദി, ഹാരിസ് റൗഫ് എന്നിവരടങ്ങുന്ന ശക്തമായ ലാഹോർ ബൗളിംഗ് ആക്രമണത്തെയാണ് ഓപ്പണിംഗ് ബാറ്റ്സ്മാനായ റോയ് നിലംപരിശാക്കിയത്.
11 ഫോറും 8 സിക്‌സറുകളുടേയും അകമ്പടിയോടെ വെറും 57 പന്തിൽ 116 റൺസ് നേടിയാണ് ജേസൺ റോയി ടീമിന്റെ വിജയ ശിൽപിയായത്. മെഗാ ലേലത്തിന് മുന്നോടിയായുള്ള ഈ ശക്തമായ പ്രകടനം താരത്തിന് ഗുണമായേക്കുമെന്നാണ് വിലയിരുത്തൽ.
ക്വേറ്റ ഗ്ലാഡിയേറ്റേഴ്സ് 3 വിക്കറ്റ് നഷ്ടത്തിൽ 19.3 ഓവറിൽ ലാഹോര്‍ ക്വലാൻഡേഴ്സ് ഉയർത്തിയ 204 റൺസ് മറികടക്കുകയായിരുന്നു. പാകിസ്ഥാൻ സൂപ്പർ ലീഗ് ടൂർണമെന്റിന്റെ ചരിത്രത്തിലെ ഏറ്റവും ഉയർന്ന രണ്ടാമത്തെ റൺചേസായിരുന്നു ഇതെന്നതും ശ്രദ്ധേയമാണ്.
