ഐ.എസ്.എല്ലിൽ മൂന്നാം സ്ഥാനം ലക്ഷ്യം വെച്ച് എ.ടി.കെ; എതിരാളികൾ ബംഗളുരു.!

ഹീറോ ഇന്ത്യൻ സൂപ്പർ ലീഗിൽ മൂന്നാം സ്ഥാനം ലക്ഷ്യം വെച്ച് എ.ടി.കെ മോഹൻ ബഗാൻ ഇന്ന് കളത്തിലിറങ്ങുകയാണ്. സ്വന്തം തട്ടകമായ സോൾട്ട് ലേക്ക് സ്റ്റേഡിയത്തിൽ വെച്ച് അരങ്ങേറുന്ന പോരാട്ടത്തിൽ ബംഗളുരുവിനെയാകും എ.ടി.കെ നേരിടുക. വൈകിട്ട് 7.30ന് ആകും ഈയൊരു മത്സരം കിക്കോഫ് ആകുക. ഏറ്റവുമൊടുവിൽ ഇരുടീമുകളും തമ്മിൽ കൊമ്പുകോർത്തിട്ടുള്ള 5 മത്സരങ്ങളിൽ 4ലും വിജയം എ.ടി.കെക്കൊപ്പമായിരുന്നു. ഒരു മത്സരം സമനിലയുമായി. ഒന്നിൽ പോലും വിജയം സ്വന്തമാക്കാൻ ബംഗളുരുവിന് കഴിഞ്ഞിട്ടില്ല.

എന്നാൽ സീസണിലെ അവസാന 4 മത്സരങ്ങളിലും മികച്ച വിജയം സ്വന്തമാക്കിക്കൊണ്ടാണ് ബംഗളുരുവിൻ്റെ വരവ്. അത് ടീമിൻ്റെ പ്രകടനത്തിന് ആത്മവിശ്വാസം പകരുമെന്നാണ് പ്രതീക്ഷ. മറുവശത്ത് അവസാന മത്സരത്തിൽ ഒഡീഷയെ കീഴടക്കിക്കൊണ്ടാണ് എ.ടി.കെ ഈയൊരു മത്സരത്തിനായി തയ്യാറെടുക്കുന്നത്. നിലവിൽ 15 മത്സരങ്ങളിൽ നിന്നും 27 പോയിൻ്റുമായി എ.ടി.കെ 4ആം സ്ഥാനത്തും, 16 മത്സരങ്ങളിൽ നിന്നും 22 പോയിൻ്റുമായി ബംഗളുരു 7ആം സ്ഥാനത്തുമാണ് ഉള്ളത്. എന്തായാലും മുൻ ചാമ്പ്യന്മാർ തമ്മിൽ മുഖാമുഖം വരുമ്പോൾ അതിവാശിയേറിയ പോരാട്ടം തന്നെ നമുക്ക് പ്രതീക്ഷിക്കാം.