പെഡ്രിയുടെ ഏകഗോളിൽ ഗെറ്റാഫെയെ മറികടന്ന് ബാർസ.!

ലാ ലിഗയിൽ വിജയക്കുതിപ്പ് തുടർന്ന് ബാർസലോണ. സ്വന്തം മൈതാനമായ ക്യാമ്പ് നൗവിൽ അരങ്ങേറിയ പോരാട്ടത്തിൽ ഏകപക്ഷീയമായ ഒരു ഗോളിന് ഗെറ്റാഫെയേയാണ് സാവിയുടെ ശിഷ്യന്മാർ കീഴടക്കിയത്. ആദ്യ പകുതിയുടെ 35ആം മിനിറ്റിലായിരുന്നു മത്സരത്തിലെ ഏകഗോൾ പിറന്നത്. മുന്നേറ്റനിര താരം റാഫീഞ്ഞയുടെ പാസിൽ നിന്നും പെഡ്രിയാണ് ആതിഥേയർക്കായി ഗോൾവല ചലിപ്പിച്ചത്. ശേഷം ലീഡ് വർധിപ്പിക്കാൻ ബാർസയും, ഗോൾ മടക്കുവാൻ ഗെറ്റാഫെയും കഴിയാവുന്നത്ര ശ്രമിച്ചുവെങ്കിലും എല്ലാം വിഫലമാകുകയായിരുന്നു.

ലെവണ്ടോസ്കിയുടെ അഭാവം ബാർസയുടെ മുന്നേറ്റ നിരയിൽ പ്രകടമായിരുന്നു. എന്നിരുന്നാലും വിജയഗോൾ കണ്ടെത്തുവാൻ അവർക്ക് സാധിച്ചു. ക്രിസ്റ്റ്യൻസണും, കോണ്ടെയും നേതൃത്വം നൽകിയ പ്രതിരോധം സന്ദർശകരെ വരിഞ്ഞുമുറുക്കുക കൂടി ചെയ്തതോടെ മത്സരം ഏകപക്ഷീയമായ ഒരു ഗോളിന് ബാഴ്സ കൈപ്പിടിയിൽ ഒതുക്കുകയായിരുന്നു. ഈയൊരു വിജയത്തോടെ ഒന്നാം സ്ഥാനത്തെ ലീഡ് ഊട്ടിയുറപ്പിക്കാൻ അവർക്ക് സാധിച്ചു. 17 മത്സരങ്ങളിൽ നിന്നും 44 പോയിൻ്റാണ് നിലവിൽ ടീമിൻ്റെ സമ്പാദ്യം. ബാഴ്സക്കായി 700ആമത് മത്സരത്തിനായിരുന്നു ക്യാപ്റ്റൻ സെർജിയോ ബുസ്ക്വെറ്റ്‌സ് ഇന്ന് കളത്തിലിറങ്ങിയത്.