പ്ലേയ് ഓഫ് സ്വപ്നവുമായി ഈസ്റ്റ് ബംഗാളും, ബംഗളുരുവും ഇന്ന് നേർക്കുനേർ.!

ഹീറോ ഇന്ത്യൻ സൂപ്പർ ലീഗിൽ ഇന്ന് തുല്യശക്തികൾ തമ്മിലുള്ള പോരാട്ടത്തിനാണ് അരങ്ങുണരുന്നത്. വൈകിട്ട് 7.30ന് കിക്കോഫ് ആകുന്ന മത്സരത്തിൽ ഈസ്റ്റ് ബംഗാൾ, ബംഗളുരു എഫ്സിയെ നേരിടും. ഈസ്റ്റ് ബംഗാളിൻ്റെ തട്ടകമായ സോൾട്ട് ലേക്ക് സ്റ്റേഡിയത്തിൽ വെച്ചാകും ഈയൊരു മത്സരം അരങ്ങേറുക. നിലവിൽ 11 മത്സരങ്ങളിൽ നിന്നും 10 പോയിൻ്റുമായി ബംഗളുരു 8ആം സ്ഥാനത്തും, 10 മത്സരങ്ങളിൽ നിന്നും 9 പോയിൻ്റുമായി ഈസ്റ്റ് ബംഗാൾ 9ആം സ്ഥാനത്തുമാണ്. രണ്ട് ടീമുകളും ഇതിനോടകം 7 മത്സരങ്ങൾ വീതം പരാജയപ്പെട്ടു കഴിഞ്ഞു.

ആദ്യ 6 സ്ഥാനക്കാർ പ്ലേയ് ഓഫിലേക്ക് യോഗ്യത നേടുമെന്നിരിക്കെ അവശേഷിക്കുന്ന സാധ്യതകൾ എങ്ങനെയും സജീവമാക്കാൻ ആകും ഇരുടീമുകളും പരിശ്രമിക്കുക. ഐ.എസ്.എല്ലിലേക്ക് വന്നതിന് ശേഷം 5 തവണയാണ് ഇരുടീമുകളും പരസ്പരം ഏറ്റുമുട്ടിയിട്ടുള്ളത്. അതിൽ 2 വിജയങ്ങൾ വീതം ഇരുടീമുകളും സ്വന്തമാക്കി. ഒരു മത്സരം സമനിലയുമായി. നിലവിലെ ഫോം കൂടി പരിഗണിച്ചാലും കരുത്തിൽ രണ്ട് ടീമുകളും തുല്യരാണ്. അതുകൊണ്ടുതന്നെ അതി വാശിയേറിയൊരു പോരാട്ടം തന്നെ നമുക്ക് പ്രതീക്ഷിക്കാം.