രാജസ്ഥാന്‍ റോയല്‍ നിലനിർത്തിയ താരങ്ങളുടെ പട്ടികയും റെഡി
ഐപിഎല്‍ പതിനാറാം സീസണിന് മുമ്പ് രാജസ്ഥാന്‍ റോയല്‍സിലെ മാറ്റങ്ങളും പുറത്ത്. അനുനയ് സിംഗ്, കോർബിന്‍ ബോഷ്, ഡാരില്‍ മിച്ചല്‍, ജയിംസ് നീഷാം, കരുണ്‍ നായർ, നേഥല്‍ കോള്‍ട്ടർ നൈല്‍, റാസ്സീ വാന്‍ ഡെർ ഡസ്സന്‍, ശുഭം ഗാർവാല്‍, തേജസ് ബരോക്ക എന്നിവരെ രാജസ്ഥാന്‍ റോയല്‍സ് ഒഴിവാക്കിയാണ് സുപ്രധാന നീക്കം. ഒഴിവാക്കിയതിൽ ഒമ്പതിൽ അഞ്ച് താരങ്ങളും വിദേശികളാണെന്നതും ശ്രദ്ധേയമാണ്.
അതേസമയം നായകൻ സഞ്ജു സാംസണ്‍, യശസ്വി ജയ്‍സ്വാള്‍, ഷിമ്രോന്‍ ഹെറ്റ്മെയർ, ദേവ്ദത്ത് പടിക്കല്‍, ജോസ് ബട്‍ലർ, ധ്രുവ് ജൂരല്‍, റിയാന്‍ പരാഗ്, പ്രസിദ്ധ് കൃഷ്ണ, ട്രെന്‍ഡ് ബോള്‍ട്ട്, ഒബെഡ് മക്കോയി, നവ്‍ദീപ് സെയ്‍നി, കുല്‍ദീപ് സെന്‍, കുല്‍ദീപ് യാദവ്, ആർ അശ്വിന്‍, യുസ്‍വേന്ദ്ര ചാഹല്‍, കെസി കാരിയപ്പ എന്നിവരെ രാജസ്ഥാന്‍ നിലനിർത്തിയിട്ടുണ്ട്.
അടുത്ത മിനി താരലേലത്തില്‍ 13.2 കോടി രൂപയാണ് രാജസ്ഥാന്‍ റോയല്‍സിന് ചിലവഴിക്കാനാവുക. ശക്തമായ ഓൾറൗണ്ടർമാരെയാണ് ഇനി ടീം താരലേലത്തിൽ നോട്ടമിടുകയെന്നാണ് ലഭിക്കുന്ന സൂചന. കഴിഞ്ഞ തവണത്തെ ഫൈനലിസ്റ്റുകളായതിനാൽ തന്നെ ഇത്തവണ കപ്പിൽ കുറഞ്ഞതൊന്നും സഞ്ജുവും കൂട്ടരും ലക്ഷ്യമിടുന്നില്ല.
