അർജൻ്റീനയ്ക്ക് കനത്ത തിരിച്ചടി; ലോകകപ്പിൽ നിന്നും സൂപ്പർതാരം പരിക്കേറ്റ് പുറത്ത്.!

ലോകകപ്പിന് തയ്യാറെടുക്കുന്ന അർജൻ്റീനയ്ക്ക് കനത്ത തിരിച്ചടി. ടീമിൻ്റെ മിഡ്ഫീൽഡിലെ നെടുംതൂണായ ജിയോവന്നി ലോ സെൽസോ പരിക്കേറ്റ് ലോകകപ്പിൽ നിന്നും പുറത്തായി. വരുന്ന 14 ന് അർജൻ്റൈൻ സ്ക്വാഡ് പ്രഖ്യാപിക്കാൻ ഇരിക്കേയാണ് ഇങ്ങനെയൊരു ദുഃഖവാർത്ത അർജൻ്റൈൻ ആരാധകരെ വിഷമത്തിൽ ആക്കുന്നത്. താരത്തിന് പരിക്കേറ്റെന്നും സർജറി വേണ്ടിവരുമെന്നും താരത്തിൻ്റെ ക്ലബായ വിയ്യറയൽ അറിയിച്ചു. കോപ്പ അമേരിക്ക, ഫൈനലിസിമ കിരീടങ്ങൾ അർജൻ്റീന നേടിയപ്പോഴും അതിൽ നിർണായക പങ്ക് വഹിച്ച താരമായിരുന്നു ലോ സെൽസോ. മധ്യനിരയിൽ ഡി പോളിനൊപ്പം ടീമിൻ്റെ നെടുംതൂൺ ആയി നിന്നുകൊണ്ടുള്ള പ്രകടനമായിരുന്നു താരത്തിൻ്റെത്. എന്നാൽ ഈയൊരു വാർത്ത സെൽസോയെ ഇഷ്ടപ്പെടുന്ന ഓരോ അർജൻ്റൈൻ ആരാധകനെയും ഈറൻ അണിയിക്കുന്നതാണ്. ഇത്തവണത്തെ ലോകകപ്പ് നേടുവാൻ ഏറ്റവും പ്രതീക്ഷ കൽപ്പിക്കപ്പെടുന്ന ടീമുകളിൽ ഒന്നാണ് അർജൻ്റീന. എന്നാൽ ലോ സെൽസോയുടെ പരിക്ക് വലിയ തിരിച്ചടിയാവും ടീമിന് സമ്മാനിക്കുക. താരത്തിന് പകരക്കാരൻ ആയി ആരെയാവും സ്കാലോണി കണ്ടെത്തുക എന്ന് നമുക്ക് കണ്ടറിയാം.