ജയിച്ചാൽ നോക്കൗട്ട്; തോറ്റാൽ കാത്തിരിക്കണം; ലിവർപൂൾ ഇന്ന് അയാക്സിനെതിരെ.!

ചാമ്പ്യൻസ് ലീഗ് ഗ്രൂപ്പ് എയിൽ ഇന്നൊരു സൂപ്പർ പോരാട്ടമാണ് അരങ്ങേറാൻ ഇരിക്കുന്നത്. ഇന്ത്യൻ സമയം അർദ്ധരാത്രി 12.30 ന് ഇംഗ്ലീഷ് വമ്പന്മാരായ ലിവർപൂൾ അയാക്സുമായി കൊമ്പുകോർക്കും. ഇന്ന് വിജയിക്കാൻ കഴിഞ്ഞാൽ ക്ലോപ്പിനും സംഘത്തിനും നോക്കൗട്ട് ഉറപ്പിക്കാൻ കഴിയും. നേരെ മറിച്ച് തോൽക്കുകയാണെങ്കിൽ ഇനിയും കാത്തിരിക്കേണ്ടിവരും. നിലവിൽ 4 മത്സരങ്ങളിൽ നിന്നും 9 പോയിൻ്റുമായി ടേബിളിൽ 2ആം സ്ഥാനത്താണ് ലിവർപൂൾ. അത്രയും കളികളിൽ നിന്നും 3 പോയിൻ്റ് മാത്രമുള്ള അയാക്‌സ് ടേബിളിൽ മൂന്നാമതാണ്. ഇന്ന് ലിവർപൂളിനെ തോൽപ്പിക്കാൻ കഴിഞ്ഞാൽ നോക്കൗട്ട് പ്രതീക്ഷകൾ നിലനിർത്തുവാൻ അവർക്ക് സാധിക്കും. സ്വന്തം മൈതാനമായ ആംസ്റ്റർഡാം അരീനയിലാണ് മത്സരം നടക്കുന്നത് എന്ന ആനുകൂല്യം കൂടി അയാക്‌സിനുണ്ട്.ഇരുവരും തമ്മിൽ ആൻഫീൽഡിൽ വെച്ച് ഏറ്റുമുട്ടിയപ്പോൾ ഒന്നിനെതിരെ 2 ഗോളുകൾക്ക് ലിവർപൂൾ ആണ് വിജയിച്ചത്. അതിനൊരു പകരംവീട്ടൽ കൂടി കണക്കാക്കിയാകും അയാക്സ് ഇന്നിറങ്ങുക. എന്തായാലും വാശിയേറിയ ഈ പോരാട്ടത്തിനായി നമുക്ക് കാത്തിരിക്കാം.