റോയൽ ചലഞ്ചേഴ്‌സ് ബാംഗ്ലൂരിന്റെ പുതിയ ക്യാപ്റ്റനായി ഡു പ്ലെസി വരുന്നു, തീരുമാനം ഉടൻ
റോയൽ ചലഞ്ചേഴ്‌സ് ബാംഗ്ലൂരിന്റെ പുതിയ ക്യാപ്റ്റനായി ഫാഫ് ഡു പ്ലെസിസിനെ നിയമിക്കുമെന്ന് റിപ്പോർട്ടുകൾ. ഇതുസംബന്ധിച്ച പ്രഖ്യാപനം ഉടൻ ഉണ്ടാകുമെന്നാണ് സൂചന. ഒരു ദശാബ്ദത്തിന് ശേഷം റോയൽ ചലഞ്ചേഴ്‌സ് ബാംഗ്ലൂരിന്റെ ക്യാപ്റ്റൻസിയിൽ മാറ്റമുണ്ടാകുമെന്ന വാർത്തകളാണ് പുറത്തുവരുന്നത്.
വിരാട് കോലി ക്യാപ്റ്റൻ സ്ഥാനം ഒഴിയുകയും എബി ഡിവില്ലിയേഴ്‌സ് വിരമിക്കൽ പ്രഖ്യാപിക്കുകയും ചെയ്‌തതിന് ശേഷം 2022 ഐപിഎൽ മെഗാ ലേലത്തിൽ ഫാഫ് ഡു പ്ലെസിസിനെ ടീമിലെത്തിച്ചതും ഇതേ കാരണത്താലാണെന്നാണ് അഭ്യൂഹം.
ഓസ്‌ട്രേലിയയുടെ ഗ്ലെൻ മാക്‌സ്‌വെല്ലിന് ഐപിഎല്ലിലെ ആദ്യ കുറച്ച് മത്സരങ്ങൾ നഷ്ടമാകുമെന്ന സ്ഥിരീകരണം വന്നതിനു പിന്നാലെ മുൻ ദക്ഷിണാഫ്രിക്കൻ താരത്തെ നായകനാക്കാനുള്ള തീരുമാനം ടീം കൈകൊള്ളുകയായിരുന്നു.
ഏകദിനം, ടി20, ടെസ്റ്റ് എന്നീ മൂന്ന് ഫോർമാറ്റുകളിലും ദക്ഷിണാഫ്രിക്കയെ വിജയകരമായി നയിച്ചുകൊണ്ട് ക്യാപ്റ്റൻസിയിൽ ഫാഫ് ഡുപ്ലെസി കാഴ്ച്ചവെച്ച മിന്നും പ്രകടവും ആർസിബിക്ക് പ്രചോദനമായിട്ടുണ്ട്.
