ബയേൺ മ്യൂണിക്കിനെ ഞെട്ടിച്ച് റെഡ് ബുൾ സാൽസ്ബർഗ്

ചാമ്പ്യൻസ് ലീഗിൽ പ്രീക്വാർട്ടറിലെ ആദ്യ പാദ മത്സരത്തിൽ മുൻ ചാമ്പ്യൻമാരായ ബയേൺ മ്യൂണിക്കിനെ ഞെട്ടിച്ച് റെഡ് ബുൾ സാൽസ്ബർഗ്. സ്വന്തം മൈതാനത്ത് നടന്ന കളിയിൽ വമ്പൻമാർക്കൊപ്പം നിൽക്കുന്ന പ്രകടനവുമായാണ് ഓസ്ട്രിയൻ ടീം 90 മിനിറ്റ് പൂർത്തിയാക്കിയത്.

പരിക്കേറ്റ ഗോൾ കീപ്പർ മാനുവൽ ന്യൂയർ ഇല്ലാതെ ഇറങ്ങിയ ബയേണിന് കളിയുടെ 21-ാം മിനിറ്റിൽ തന്നെ ഒരു ഗോളിന് പിന്നിലാവേണ്ടി വന്നു. ബ്രണ്ടൻ ആരോൺസണിന്റെ പാസിൽ നിന്നു ഇരുപതുകാരൻ അദാമു ആണ് സാൽസ്ബർഗിനായി വല കുലുക്കിയത്.

തുടർന്ന് ഗോൾ തിരിച്ചടിക്കാനുള്ള ബയേണിന്റെ ശ്രമങ്ങൾ ആണ് കാണാനായതെങ്കിലും 90-ാം മിനിറ്റു വരെ അതിനായി കാത്തിരിക്കേണ്ടി വന്നു. കളിയുടെ അവസാന നിമിഷം തേൽവിയിലേക്ക് കൂപ്പുകുത്തുമെന്ന് തോന്നിച്ച നിമിഷം ഫ്രഞ്ച് താരം കിംഗ്സ്‌ലി കോമാനിലൂടെയാണ് ബയേൺ മറുപടി ഗോൾ കണ്ടെത്തിയത്. മത്സരത്തിൽ 72 ശതമാനം പന്ത് കൈവശം വച്ച മത്സരത്തിൽ അവർ 22 ഷോട്ടുകൾ ആണ് ഉതിർത്തത്.