ട്രിപ്പിയർ പരിക്കേറ്റ് പുറത്ത്, ന്യൂകാസിൽ യുണൈറ്റഡിന് തിരിച്ചടി

ഇംഗ്ലീഷ് പ്രീമിയർ ലീഗിൽ തരംതാഴ്ത്തൽ ഭീഷണിയിൽ നിന്നും ഉയർത്തെഴുന്നേറ്റ ന്യൂകാസിൽ യുണൈറ്റഡിന് തിരിച്ചടി. ജനുവരി ട്രാൻസ്‌ഫർ വിൻഡോയിൽ ടീമിലെത്തിയ കീറൻ ട്രിപ്പിയറിന് പരിക്കേറ്റ് പുറത്തായതായാണ് ന്യൂകാസിൽ അറിയിച്ചിരിക്കുന്നത്.

ആസ്റ്റൺ വില്ലയ്‌ക്കെതിരായ മത്സരത്തിനിടെയാണ് ഇംഗ്ലീഷ് ലെഫ്റ്റ് ബാക്കിന് പരിക്കേറ്റത്. കാലിലെ എല്ലിന് പൊട്ടലുണ്ടായതിനെ തുടർന്ന് കീറൻ ട്രിപ്പിയർ വരാനിരിക്കുന്ന മത്സരങ്ങളിൽ നിന്ന് വിട്ടുനിൽക്കുമെന്നാണ് ക്ലബ് അറിയിച്ചിരിക്കുന്നത്. പരിക്ക് മാറാൻ ശസ്ത്രക്രിയയും വേണ്ടി വരുമെന്നും ടീം വ്യക്തമാക്കിയിട്ടുണ്ട്.

ആസ്റ്റൺ വില്ലക്ക് എതിരെ നേടിയ വിജയ ഗോൾ ഉൾപ്പെടെ രണ്ട് ഗോളുകളാണ് ട്രിപ്പിയർ ഇതിനകം സ്വന്തമാക്കിയിരിക്കുന്നത്. ജനുവരി ട്രാൻസ്ഫർ വിൻഡോയിൽ അത്‌ലറ്റിക്കോ മാഡ്രിഡിൽ നിന്ന് മാഗ്‌പീസ് ടീമിൽ ചേർന്നതിനുശേഷം ഫുൾ ബാക്ക് ടീമിനായി ശ്രദ്ധേയമായ പ്രകനമാണ് കാഴ്ച്ചവെച്ചത്. 12 ദശലക്ഷം പൗണ്ടിനാണ് താരം ക്ലബിലെത്തിയത്.