ഐഎസ്എല്ലില്‍ ജംഷഡ്പുരിനെതിരേ കേരളാ ബ്ലാസ്റ്റേഴ്സിന് പരാജയം
ഐഎസ് ഫുട്ബോളിൽ കേരളാ ബ്ലാസ്റ്റേഴ്സിന് വമ്പൻ തോൽവി. ഇന്നലെ നടന്ന മത്സരത്തിൽ ജംഷഡ്‌പൂരിനോട് എതിരില്ലാത്ത മൂന്നു ഗോളുകൾക്കാണ് കൊമ്പൻമാർ അടിയറവു പറഞ്ഞത്.
തോൽവിയോടെ കേരളാ ബ്ലാസ്റ്റേഴ്സ് അഞ്ചാം സ്ഥാനത്തേയ്ക്ക് പിന്തള്ളപ്പെടുകയും ചെയ്‌തു. നാല് മാറ്റങ്ങളുമായി ഇറങ്ങിയ ബ്ലാസ്റ്റേഴ്സ് പതിവ് താളം തെറ്റിച്ചാണ് കളിക്കാനിറങ്ങിയത്. രണ്ട് പെനാൽറ്റിയാണ് ടീമിന് ഇത്രയും വലിയ പരാജയം സമ്മാനിച്ചതും.
44-ാം മിനിറ്റില്‍ ധനചന്ദ്രെ ഗ്രെഗ്, സ്റ്റുവര്‍ട്ടിനെ വീഴ്ത്തിയതിന് ജംഷഡ്പുരിന് പെനാല്‍റ്റി ലഭിച്ചു. രണ്ടാം പകുതിയില്‍ ബ്ലാസ്റ്റേഴ്സ് കളിയിലേക്ക് തിരിച്ചെത്തും മുമ്പ് അടുത്ത പെനാല്‍റ്റിയും വീണതോടെ കേരളാ ടീം നിരാശയിലേക്ക് വീണു. തുടർന്ന് അധികം വൈകാതെ തന്നെ 54-ാം മിനിറ്റില്‍ മൂന്നാം ഗോളും വഴങ്ങിയതോടെ മത്സരം കൈവിട്ടു പോവുകയായിരുന്നു.
ജയത്തോടെ ബ്ലാസ്‌റ്റേഴസിനെ മറികടന്ന് ജംഷഡ്പുര്‍ രണ്ടാം സ്ഥാനത്തെത്തി. 14 മത്സരങ്ങളില്‍ 25 പോയിന്റാണ് ജംഷഡ്പുരിനുള്ളത്. അതേസമയം 14 കളികളില്‍ നിന്ന് 23 പോയിന്റുമായി ബ്ലാസ്റ്റേഴ്സ് അഞ്ചാം സ്ഥാനത്തേക്ക് പിന്തള്ളപ്പെടുകയും ചെയ്‌തു. മത്സരം കടുപ്പമുള്ളതാകും എന്ന് ഉറപ്പായിരിന്നുവെന്നും അടുത്ത മത്സരത്തിൽ ശക്തമായി തിരിച്ചുവരേണ്ടതുണ്ട് എന്നും ബ്ലാസ്റ്റേഴ്സ് പരിശീലകൻ ഇവാൻ വുകമാനോവിച് മത്സര ശേഷം പറഞ്ഞു.
