പുതിയ ഐപിഎൽ ടീമിന്റെ പേര് പ്രഖ്യാപിച്ച് അഹമ്മദാബാദ്

ഇന്ത്യൻ പ്രീമിയർ ലീഗ് ക്രിക്കറ്റിലെ ഏറ്റവും പുതിയ ഫ്രാഞ്ചൈസിയായ അഹമ്മദാബാദ് ടീമിന്റെയും പേര് പ്രഖ്യാപിച്ചു. അഹമ്മദാബാദ് ടൈറ്റന്‍സ് എന്ന പേരിലായിരിക്കും പുതിയ ടീം അറിയപ്പെടുക.

ഇതോടെ പുതുതായി ഐപിഎല്ലിന്റെ ഭാഗമായ രണ്ടു ടീമുകള്‍ക്കും പേരായിരിക്കുകയാണ്. നേരത്തെ പുതിയ ഫ്രാഞ്ചൈസിയായ ലഖ്‌നൗ തങ്ങളുടെ പേര് ലഖ്‌നൗ സൂപ്പര്‍ ജയന്റ്‌സ് എന്നായിരിക്കുമെന്ന് ഔദ്യോഗികമായി വ്യക്തമാക്കിയിരുന്നു.

ഹാര്‍ദ്ദിക് പാണ്ഡ്യ നായകനാകുന്ന അഹമ്മദാബാദ് ടൈറ്റന്‍സ് ടീമില്‍ റഷീദ് ഖാന്‍, ശുഭ്മന്‍ ഗില്‍ എന്നീ കേമൻമാരെയും ടീം ലേലത്തിന് മുന്നോടിയായി ഡ്രാഫ്ടില്‍ തെരഞ്ഞെടുത്തിട്ടുണ്ട്. സിവിസി ക്യാപിറ്റല്‍സ് ആണ് അഹമ്മദാബാദ് ഐപിഎൽ ടീമിന്റെ ഉടമസ്ഥര്‍. ടീമിന്റെ മെന്ററായി ഇന്ത്യയ്ക്ക് ലോകകപ്പ് കിരീടം ചൂടികൊടുത്ത ഗാരി ക്രിസ്റ്റനെയും പ്രഖ്യാപിച്ചിരുന്നു.

ഫെബ്രുവരി 12,13 തീയതികളിലാണ് 14-ാമത് ഐപിഎല്ലിനായുള്ള മെഗാ ലേലം നടക്കാനിരിക്കുന്നത്. 590 താരങ്ങള്‍ പങ്കെടുക്കുന്ന മെഗാ താരലേലത്തില്‍ 10 ടീമുകളും താരങ്ങളെ സ്വന്തമാക്കും. ലഖ്‌നൗ, അഹമ്മദാബാദ് എന്നീ രണ്ട് ടീമുകളുടെ വരവോടെ ടൂര്‍ണമെന്റ് കൂടുതല്‍ കഠിനമാകും. പഴയ പല താരങ്ങളും ഇത്തവണ തങ്ങളുടെ പഴയ ടീം വിട്ട് ലേലത്തിന് പങ്കെടുക്കുന്നുമുണ്ട്.